દીપક ટોકીઝ રોડના વિનાયક એપાર્ટમેન્ટમાં સીટી-એ ડિવિઝન પોલીસનો દરોડો; દારૂ રાખવા મકાનમાં જગ્યા આપનાર માલિક સામે પણ મદદગારીનો ગુનો
જામનગરના દીપક ટોકીઝ રોડ પર ટી.જી. નોવેલ્ટી સ્ટોર નજીક આવેલા વિનાયક એપાર્ટમેન્ટમાં સીટી-એ ડિવિઝન પોલીસે દરોડો પાડી ભારતીય બનાવટના વિદેશી દારૂની 20 બોટલ સાથે એક શખ્સને ઝડપી લીધો હતો. પોલીસે રૂ.26 હજારની કિંમતનો દારૂનો જથ્થો કબજે કર્યો છે. આ ઉપરાંત, દારૂનો જથ્થો રાખવા માટે પોતાના મકાનમાં જગ્યા આપનાર મકાનમાલિક સામે પણ મદદગારીનો ગુનો નોંધવામાં આવ્યો છે.
વિનાયક એપાર્ટમેન્ટના મકાનમાં દરોડો
પોલીસને મળેલી બાતમીના આધારે દીગ્વિજય પ્લોટ-60માં આવેલા વિનાયક એપાર્ટમેન્ટની સી-વિંગના મકાન નંબર સી/101માં દરોડો પાડવામાં આવ્યો હતો. આ સમયે મકાનમાં રહેતા મનોજભાઈ જગજીવનભાઈ શિંગાળાની હાજરીમાં તપાસ કરવામાં આવી હતી. દરમિયાન રૂમમાંથી રવીરાજ કેશુમલભાઈ રામનાણી (ઉં.વ. 31) મળી આવ્યો હતો.
તેની પાસે રહેલી પ્લાસ્ટિકની થેલીઓની તપાસ કરતાં રોયલ ચેલેન્જ બ્રાન્ડની 750 મિલીલીટરની 20 શીલબંધ બોટલ મળી આવી હતી. દારૂનો જથ્થો રાખવા અંગે કોઈ પાસ-પરમિટ ન હોવાનું સામે આવતાં પોલીસે રૂ.26 હજારનો મુદ્દામાલ કબજે કર્યો હતો.
દારૂનો જથ્થો સુરજ ઉર્ફે સુર્યો પાસેથી લાવ્યો હોવાનો ખુલાસો
પોલીસની પૂછપરછ દરમિયાન રવીરાજ રામનાણીએ આ દારૂનો જથ્થો સુભાષ પાર્ક, રણજીતસાગર રોડ પર રહેતા સુરજભાઈ ઉર્ફે સુરેશ ઉર્ફે સુર્યો કોળી પાસેથી લાવ્યો હોવાનું જણાવ્યું હતું.
મકાનમાલિક મનોજભાઈ શિંગાળાએ પોતાના મકાનમાં દારૂનો જથ્થો રાખવાની સંમતિ આપીને મદદગારી કરી હોવાનું સામે આવતાં તેમની સામે પણ પ્રોહિબિશન એક્ટ હેઠળ ગુનો નોંધવામાં આવ્યો હતો.
એકની અટકાયત, સપ્લાયરને શોધવા તપાસ
પોલીસે મકાનમાલિક મનોજભાઈ શિંગાળાને ભારતીય નાગરિક સુરક્ષા સંહિતાની કલમ 35(3)(1) મુજબ નોટિસ આપી મુક્ત કર્યા હતા. જ્યારે રવીરાજ રામનાણીને સાંજે 5:20 વાગ્યે અટકાયત કરવામાં આવી હતી.
દારૂનો જથ્થો પૂરો પાડનાર સુરજ ઉર્ફે સુર્યો કોળીને ઝડપી લેવા પોલીસે વધુ તપાસ હાથ ધરી છે. દારૂનો જથ્થો ક્યાંથી લાવવામાં આવ્યો હતો અને આ પ્રવૃત્તિમાં અન્ય કોઈની સંડોવણી છે કે કેમ તે દિશામાં પણ તપાસ કરવામાં આવી રહી છે.
