મોટા થાવરિયા નજીક આલિયા રોડ પર અકસ્માત; હરિપર ગામનાં તૃપ્તિબેન વસોયાએ જીવ ગુમાવ્યો, બાળકને જી.જી. હોસ્પિટલમાં ખસેડાયો
જામનગર: જામનગર-કાલાવડ ધોરીમાર્ગ પર અકસ્માતોની ઘટનાઓ અટકવાનું નામ લેતી નથી. મોટા થાવરિયા નજીક આલિયા રોડ પર બે એક્ટિવા સામસામે અથડાતાં ગંભીર અકસ્માત સર્જાયો હતો. આ દુર્ઘટનામાં હરિપર ગામનાં રહેવાસી તૃપ્તિબેન વસોયાનું મોત નીપજ્યું હતું, જ્યારે તેમની સાથે રહેલો છ વર્ષનો પુત્ર આર્ય ઈજાગ્રસ્ત થયો હતો. માતાના મોત અને બાળકને ઈજા થતાં પરિવારજનોમાં શોકની લાગણી ફેલાઈ છે.
સાંજે 5:45 વાગ્યે બે એક્ટિવા વચ્ચે ટક્કર
પ્રાપ્ત વિગતો મુજબ, 15 નવેમ્બરના રોજ સાંજે આશરે 5:45 વાગ્યે મોટા થાવરિયા-આલિયા રોડ પર બે એક્ટિવા વચ્ચે જોરદાર અથડામણ થઈ હતી. ટક્કર એટલી ગંભીર હતી કે તૃપ્તિબેન વસોયાને જીવલેણ ઈજાઓ પહોંચી હતી અને તેમનું ઘટનાસ્થળે અથવા સારવાર દરમિયાન મોત નીપજ્યું હોવાનું જાણવા મળ્યું છે.
પુત્રના માથામાં ગંભીર ઈજા
અકસ્મતમાં તૃપ્તિબેનના છ વર્ષીય પુત્ર આર્ય ચિરાગભાઈ વસોયાને માથાના ભાગે ઈજા થઈ હતી. તેને ખુલ્લો ઘા પડતાં લોહી નીકળવા લાગ્યું હતું. ઘટનાની જાણ થતાં 108 એમ્બ્યુલન્સની ટીમ તાત્કાલિક સ્થળ પર પહોંચી હતી. બાળકને પ્રાથમિક સારવાર આપ્યા બાદ વધુ સારવાર માટે જામનગરની જી.જી. હોસ્પિટલમાં ખસેડવામાં આવ્યો હતો.
પરિવારમાં શોકનો માહોલ
એક જ અકસ્માતમાં માતાનું મોત અને માસૂમ પુત્ર ઘાયલ થતાં વસોયા પરિવારમાં ઘેરો શોક છવાયો છે. બનાવ અંગે પોલીસે જરૂરી કાર્યવાહી હાથ ધરી છે. અકસ્માત કેવી રીતે સર્જાયો તે અંગે વધુ વિગતો તપાસ બાદ સ્પષ્ટ થશે.










