રાણપરડા ગામની સીમમાં LCBની કાર્યવાહી; બે આરોપીઓ ઝડપાયા, અન્ય બેની સંડોવણી પણ સામે આવી
દેવભૂમિ દ્વારકા જિલ્લાના ભાણવડ તાલુકામાં સ્થાનિક ગુના શોધક શાખા (LCB) દ્વારા દારૂની હેરાફેરી સામે કાર્યવાહી કરવામાં આવી હતી. રાણપરડા ગામની સીમમાંથી પસાર થતી એક SUV કારને અટકાવી તપાસ કરતાં તેમાંથી વિદેશી દારૂનો જથ્થો મળી આવ્યો હતો. પોલીસે દારૂ, કાર અને મોબાઈલ ફોન સહિત કુલ રૂ.6.19 લાખનો મુદ્દામાલ કબજે કરી બે શખ્સોની ધરપકડ કરી છે.
બાતમીના આધારે કાર રોકી તપાસ
દેવભૂમિ દ્વારકા LCBના ઈન્ચાર્જ PI એન.એચ. જોશીના માર્ગદર્શન હેઠળ ASI શક્તિસિંહ જાડેજા, શક્તિસિંહ ઝાલા, વેજાણંદભાઈ બેરા અને મનહરસિંહ જાડેજાની ટીમને મળેલી બાતમીના આધારે કાર્યવાહી કરવામાં આવી હતી.
ભાણવડ તાલુકાના રાણપરડા ગામની સીમમાં રાત્રિના સમયે પસાર થતી GJ-25-BA-8786 નંબરની SUV કારને અટકાવી તપાસ કરવામાં આવી હતી. દરમિયાન કારમાંથી વિદેશી દારૂનો જથ્થો મળી આવતાં પોલીસે દારૂ સહિતનો મુદ્દામાલ કબજે કર્યો હતો.
રૂ.6.19 લાખનો મુદ્દામાલ જપ્ત
પોલીસે આ કાર્યવાહી દરમિયાન કુલ રૂ.6,19,000નો મુદ્દામાલ કબજે કર્યો હતો. જેમાં રૂ.2,99,000ની કિંમતનો 299 નંગ વિદેશી દારૂનો જથ્થો, રૂ.3 લાખની SUV કાર અને રૂ.20,000ની કિંમતના બે મોબાઈલ ફોનનો સમાવેશ થાય છે.
આ મામલે રાણપર ગામના રહેવાસી રબારી જગા દાના શામળા અને યુવરાજસિંહ રૂપસંગ સોલંકીને ઝડપી લેવામાં આવ્યા હતા.
અન્ય બે શખ્સોની સંડોવણી પણ સામે આવી
પોલીસ તપાસ દરમિયાન જામનગર જિલ્લાના જામજોધપુર તાલુકાના વાંસઝાડિયા ગામના પરબત ઉર્ફે પબા મેરા મોરી અને કલ્યાણપુર તાલુકાના ભોપાલકા ગામના દિગ્વિજયસિંહ ઉર્ફે લંગડો આલુભા જાડેજાની પણ આ પ્રકરણમાં સંડોવણી હોવાનું સામે આવ્યું છે.
LCB પોલીસની ફરિયાદના આધારે ભાણવડ પોલીસ મથકમાં આ મામલે ગુનો નોંધવામાં આવ્યો છે. પોલીસે સમગ્ર પ્રકરણમાં વધુ તપાસ હાથ ધરી છે.









