અલીફનગર રોડની ઓરડીમાંથી પાંચ વાહનો સહિત રૂ. 4.26 લાખનો મુદ્દામાલ કબજે; 8 જીવિત પશુઓ ભૂખ્યા-તરસ્યા હાલતમાં મળ્યાં, બે આરોપી ફરાર
અમદાવાદ: શહેરના નારોલ વિસ્તારમાં ગેરકાયદે રીતે ચાલતા પશુ કતલખાના પર પોલીસે દરોડો પાડીને મોટી કાર્યવાહી કરી છે. વટવા ટર્નિંગથી સદાની ધાબી તરફ જતા માર્ગ પર દયારામ ફેક્ટરી સામે અલીફનગર રોડ પર આવેલી એક ઓરડીમાં રવિવારે દરોડો પાડવામાં આવ્યો હતો. કાર્યવાહી દરમિયાન પોલીસે 700 કિલોગ્રામ ભેંસનું માંસ, પાંચ વાહનો અને મોબાઇલ સહિત કુલ રૂ. 4.26 લાખનો મુદ્દામાલ કબજે કર્યો છે. પોલીસે ચાર આરોપીઓની ધરપકડ કરી છે, જ્યારે એક સગીર કાયદાના સંઘર્ષમાં આવ્યો છે. અન્ય બે આરોપીઓ ફરાર હોવાથી તેમની શોધખોળ ચાલુ છે.
ઓરડી અને ટેમ્પોમાંથી 700 કિલો માંસ મળી આવ્યું
નારોલ પોલીસને બાતમી મળી હતી કે અલીફનગર રોડ પર આવેલી ઓરડીમાં ગેરકાયદે પશુઓની કતલ કરવામાં આવી રહી છે. આ માહિતીના આધારે પોલીસે સ્થળ પર દરોડો પાડ્યો હતો. તપાસ દરમિયાન ઓરડીમાંથી તેમજ બહાર પાર્ક કરેલા લોડિંગ ટેમ્પોમાંથી આશરે 700 કિલોગ્રામ ભેંસનું માંસ મળી આવ્યું હતું.
8 પશુઓ ભૂખ્યા-તરસ્યા હાલતમાં બાંધેલા મળ્યાં
કતલખાનાની બાજુમાં આવેલી ખુલ્લી જગ્યામાંથી કુલ આઠ જીવિત પશુઓ મળી આવ્યાં હતાં. તેમાં પાંચ વર્ષની ચાર ભેંસ અને દોઢ વર્ષના ચાર પાડાનો સમાવેશ થાય છે. આ તમામ પશુઓને ભૂખ્યા-તરસ્યા હાલતમાં બાંધી રાખવામાં આવ્યાં હોવાનું પોલીસ તપાસમાં સામે આવ્યું છે.
ચાર આરોપીઓની ધરપકડ, એક સગીરનો કબજો વાલીને સોંપાયો
પોલીસે સ્થળ પરથી મોહંમદ રફીક ઉર્ફે બાબા મોહંમદ સીદ્દીક લાલમીયાં શેખ (ઉંમર 35, રહે. વટવા), અશફાક ઉર્ફે મામા મજીદ મુદ્દીન કુરેશી (ઉંમર 56, રહે. વટવા), મોહસીન ઉર્ફે મોહમ્મદઉંમર ફારૂક યાસીન કુરેશી (ઉંમર 33, રહે. નારોલ) અને મોહમદ અમન મોહમદ હનીફ રફીક કુરેશી (ઉંમર 18, રહે. નારોલ)ને ઝડપી લીધા હતા.
આ ઉપરાંત 16 વર્ષનો એક સગીર પણ કાયદાના સંઘર્ષમાં આવ્યો હતો. કાયદાકીય પ્રક્રિયા મુજબ તેનો કબજો તેના વાલીને સોંપવામાં આવ્યો છે. જ્યારે અન્ય બે આરોપીઓ ફરાર હોવાથી પોલીસ તેમની શોધખોળ કરી રહી છે.
મમ્મુ બુખારીની માલિકીની જગ્યા ભાડે અપાઈ હોવાનો ખુલાસો
પ્રાથમિક પૂછપરછમાં પોલીસને જાણવા મળ્યું છે કે જે ઓરડીમાં કતલખાનું ચાલતું હતું તે જગ્યા મમ્મુ બુખારીની માલિકીની છે. તેણે આ જગ્યા મોહંમદ રફીક અને તેના મિત્ર મુનાવર ઉર્ફે સની બુખારી (રહે. વટવા)ને પશુઓની કતલ કરવા માટે ભાડે આપી હોવાનું સામે આવ્યું છે.
પોલીસ તપાસ મુજબ, શનિવારે અહીં 20 પશુઓ લાવવામાં આવ્યાં હતાં. તેમાંથી 12 પશુઓની રવિવારે સવારે કતલ કરીને માંસ મિર્ઝાપુર બજારમાં વેચવાની તૈયારી કરવામાં આવી હતી. સમગ્ર મામલે પોલીસે વધુ તપાસ હાથ ધરી છે.










