સ્વિફ્ટ કારમાંથી પણ દારૂનો જથ્થો મળી આવ્યો; રૂ.5.08 લાખનો મુદ્દામાલ જપ્ત, બુટલેગર રોહિત ડાંગરની ધરપકડ
ઉપલેટા: રાજકોટ ગ્રામ્ય વિસ્તારમાં દારૂની ગેરકાયદે પ્રવૃત્તિઓ સામે કાર્યવાહી કરતાં રૂરલ લોકલ ક્રાઇમ બ્રાન્ચ (LCB)ની ટીમે ઉપલેટાના નીલાખા ગામની સીમમાં આવેલી એક વાડીમાં દરોડો પાડ્યો હતો. આ કાર્યવાહી દરમિયાન મગફળીના ભુક્કા અને સ્વિફ્ટ કારમાં છુપાવેલી દારૂની 1,812 બોટલ મળી આવી હતી. પોલીસે દારૂ, કાર અને મોબાઇલ સહિત કુલ રૂ.5,08,680નો મુદ્દામાલ કબજે કરી રોહિત ગોવિંદ ડાંગર નામના શખ્સની ધરપકડ કરી હતી. જ્યારે વાડીના માલિક અને દારૂનો જથ્થો મોકલનાર શખ્સની શોધખોળ શરૂ કરવામાં આવી છે.
બાતમીના આધારે વાડીમાં દરોડો
રાજકોટ ગ્રામ્ય વિસ્તારમાં દારૂ અને જુગારની ગેરકાયદે પ્રવૃત્તિઓને ડામવા પોલીસ અધિક્ષક વિજયસિંહ ગુર્જર દ્વારા સૂચના આપવામાં આવી હતી. આ સૂચનાને પગલે રૂરલ LCBના પોલીસ ઇન્સ્પેક્ટર જે.પી. રાવના માર્ગદર્શન હેઠળ ટીમ પેટ્રોલિંગમાં હતી. દરમિયાન મળેલી ચોક્કસ બાતમીના આધારે ટીમે ઉપલેટાના નીલાખા ગામની સીમમાં આવેલી વાડીમાં દરોડો પાડ્યો હતો.
દરોડા દરમિયાન મગફળીના ભુક્કામાં તેમજ GJ-03-HA-5557 નંબરની સ્વિફ્ટ કારમાં છુપાવેલો વિદેશી દારૂનો જથ્થો મળી આવ્યો હતો. પોલીસે તપાસ કરતાં દારૂની કુલ 1,812 બોટલ મળી આવી હતી, જેની કિંમત રૂ.2,53,680 હોવાનું નોંધાયું હતું.
રોહિત ડાંગરની ધરપકડ, બે શખ્સોની શોધખોળ
પોલીસે સ્થળ પરથી દારૂ ઉપરાંત સ્વિફ્ટ કાર અને મોબાઇલ ફોન સહિત કુલ રૂ.5,08,680નો મુદ્દામાલ કબજે કર્યો હતો. આ મામલે રોહિત ગોવિંદ ડાંગર (રહે. કૈલાશનગર, ઉપલેટા; મૂળ વતન ભાણવડ, દ્વારકા)ની ધરપકડ કરવામાં આવી હતી.
દરોડા દરમિયાન વાડીનો માલિક લખમણ સીદા મકવાણા (રહે. વલ્લભ વિદ્યાનગર સ્કૂલ પાસે, ઉપલેટા) હાજર મળી આવ્યો નહોતો. આ ઉપરાંત દારૂનો જથ્થો મોકલનાર નગા જગા કરમુર (રહે. જામનગર)ની પણ પોલીસે શોધખોળ શરૂ કરી છે.
પેટી દીઠ રૂ.500 આપવાનું નક્કી થયાનું પૂછપરછમાં ખુલ્યું
પોલીસની પ્રાથમિક પૂછપરછ દરમિયાન ઝડપાયેલા રોહિત ડાંગરે જણાવ્યું હોવાનું જાણવા મળ્યું છે કે દારૂનો જથ્થો જામનગરના નગા જગા કરમુરે બોલેરો પિકઅપ ગાડી મારફતે મોકલ્યો હતો. વાડીમાં દારૂનો જથ્થો રાખવા બદલ વાડીના માલિક લખમણ મકવાણાને પેટી દીઠ રૂ.500 આપવાનું નક્કી કરવામાં આવ્યું હોવાનું પણ તેણે જણાવ્યું હતું. પોલીસ આ કબૂલાત અને દારૂના જથ્થાના સ્ત્રોત સહિતના મુદ્દાઓની વધુ તપાસ કરી રહી છે.
LCBની ટીમની કામગીરી
આ દરોડાની કામગીરી રૂરલ LCBના PSI કે.એમ. ચાવડા, એચ.સી. ગોહિલ, આર.વી. ભીમાણી, પી.એન. ભરવાડ સહિતની ટીમ દ્વારા કરવામાં આવી હતી. પોલીસે ઝડપાયેલા શખ્સ સામે કાયદેસરની કાર્યવાહી હાથ ધરી છે અને ફરાર વાડી માલિક તથા સપ્લાયરની શોધખોળ ચાલુ રાખી છે.
