રાજકોટના રેસકોર્સ ગ્રાઉન્ડથી મુખ્યમંત્રી ભૂપેન્દ્ર પટેલે સખીમંડળ સંચાલિત ગ્રામહાટનું લોકાર્પણ કર્યું; ત્રણ દિવસના સરસ મેળાનો પ્રારંભ, મહિલાઓને બજાર અને રોજગારીની નવી તકો મળશે
રાજકોટ, તા. 10: નવરાત્રિ પૂર્વે ગુજરાતની મહિલાઓને ભેટ આપતાં મુખ્યમંત્રી ભૂપેન્દ્ર પટેલે રાજકોટના રેસકોર્સ ગ્રાઉન્ડ ખાતેથી રાજ્યના 27 જિલ્લાનાં બસ સ્ટેશનો પર સખીમંડળો દ્વારા સંચાલિત 136 ગ્રામહાટનું ઈ-લોકાર્પણ કર્યું હતું. આ સાથે મહિલાઓના આર્થિક સશક્તિકરણ માટેની વિવિધ પહેલોનો પ્રારંભ કરાવ્યો હતો અને ત્રણ દિવસના ‘સરસ મેળા’નું ઉદ્ઘાટન કર્યું હતું.
કાર્યક્રમને સંબોધતાં મુખ્યમંત્રીએ જણાવ્યું હતું કે, મહિલાઓને વિકાસયાત્રામાં માત્ર લાભાર્થી નહીં, પરંતુ વિકાસના ભાગીદાર બનાવવાનો વડાપ્રધાન નરેન્દ્ર મોદીનો સંકલ્પ છે. સખીમંડળોની બહેનોનાં હસ્તકલા ઉત્પાદનો અને ગૃહઉદ્યોગની વસ્તુઓને વિશાળ બજાર મળી રહે તે માટે બસ સ્ટેશનો અને રેલવે સ્ટેશનો પર વેચાણની વ્યવસ્થા ઊભી કરવામાં આવી રહી છે. આ પહેલથી ‘વોકલ ફોર લોકલ’ના અભિયાનને પણ વેગ મળશે.
મહિલાઓને ડિજિટલ ઉદ્યોગસાહસિક બનાવવા માટે એનઆઈએફટી, માઈકા અને અન્ય પ્રતિષ્ઠિત સંસ્થાઓ દ્વારા માર્ગદર્શન તથા મેન્ટરશિપ આપવામાં આવશે. આ ઉપરાંત, અમૂલ સાથે થયેલા સમજૂતી કરારના આધારે રાજ્યનાં 18 હજાર ગામોમાં મહિલા સંચાલિત મિલ્ક પાર્લર શરૂ કરવાની યોજના પણ રજૂ કરવામાં આવી હતી.
મુખ્યમંત્રીએ જણાવ્યું હતું કે, રાજ્યમાં આશરે અઢી લાખ સખીમંડળો સાથે જોડાયેલી 30 લાખ ગ્રામીણ મહિલાઓ પોતાની આવડત અને મહેનતથી આવક મેળવી રહી છે. મહિલાઓને આત્મનિર્ભર બનાવવા માટે રાજ્ય સરકારે ગયા વર્ષે રૂ. 800 કરોડની સહાય આપી હતી. તેમણે વધુમાં જણાવ્યું હતું કે, વર્ષ 2029 સુધીમાં દેશમાં છ કરોડ ‘લખપતિ દીદી’ બનાવવાના લક્ષ્ય સામે ગુજરાતમાં અત્યાર સુધીમાં 8.5 લાખથી વધુ મહિલાઓ આ શ્રેણીમાં આવી ચૂકી છે.
13 સમજૂતી કરાર, લાખોની સહાયનું વિતરણ
મહિલા સ્વસહાય જૂથોના ઉત્પાદનોના માર્કેટિંગ અને વેચાણને પ્રોત્સાહન આપવા માટે વિવિધ સરકારી વિભાગો, રેલવે, જીએસઆરટીસી, અમૂલ, શૈક્ષણિક સંસ્થાઓ અને બેંકો સાથે કુલ 13 સમજૂતી કરાર કરવામાં આવ્યા હતા.
કાર્યક્રમ દરમિયાન વિવિધ સ્વસહાય જૂથોને અમૂલ પાર્લર ફાળવણીના પત્રો આપવામાં આવ્યા હતા. ઉપરાંત, રૂ. 45 લાખના કેશ ક્રેડિટ ચેક, ડેરી સાથે સંકળાયેલા સ્વસહાય જૂથોને રૂ. 40 લાખના કેશ ક્રેડિટ ચેક અને અન્ય સખીમંડળોને ઈ-કોમર્સ ઇન્સેન્ટિવ પેટે કુલ રૂ. 1,08,640ના ચેક એનાયત કરવામાં આવ્યા હતા.
ગ્રામવિકાસ મંત્રી કુંવરજીભાઈ બાવળીયાએ જણાવ્યું હતું કે, ‘મિશન મંગલમ’ અભિયાન ગ્રામીણ મહિલાઓને આર્થિક રીતે મજબૂત બનાવવામાં મહત્વપૂર્ણ ભૂમિકા ભજવી રહ્યું છે. છેલ્લા પાંચ વર્ષમાં રાજ્યમાં યોજાયેલા 236 જેટલા સરસ મેળામાં આશરે 8,500 સ્વસહાય જૂથોએ રૂ. 40 કરોડનું વેચાણ કર્યું હોવાનું તેમણે જણાવ્યું હતું.
આ પ્રસંગે અંત્યોદયની ભાવનાને સાકાર કરવા વિચરતી-વિમુક્ત જાતિના 139 પરિવારોને રહેઠાણ માટે વિનામૂલ્યે પ્લોટનું વિતરણ પણ કરવામાં આવ્યું હતું. કાર્યક્રમમાં મંત્રી જીતુભાઈ વાઘાણી, મેયર ડૉ. નેહલ શુક્લ, સાંસદ પરશોત્તમ રૂપાલા, ધારાસભ્યો, અધિકારીઓ, સખીમંડળોની મહિલાઓ અને નાગરિકો ઉપસ્થિત રહ્યા હતા.
મુખ્યમંત્રીના સ્વાગત સમયે સ્ટેજ પર અણધાર્યું દૃશ્ય
રાજકોટના રેસકોર્સ ગ્રાઉન્ડ ખાતે યોજાયેલા કાર્યક્રમમાં મુખ્યમંત્રીના સ્વાગત દરમિયાન પણ ચર્ચાસ્પદ દૃશ્ય સર્જાયું હતું. અહેવાલ મુજબ, ધારાસભ્ય ડૉ. મહેન્દ્ર પાડલીયાનું નામ સ્વાગત માટે બોલાય તે પહેલાં જ તેઓ સ્ટેજ પર પહોંચી ગયા હતા. ત્યારબાદ મેયર ડૉ. નેહલ શુક્લનું નામ બોલાતાં સ્વાગત માટેની સુતરની આંટી ધારાસભ્ય દ્વારા લઈ લેવામાં આવી હતી. આ ઘટનાને કારણે મેયર સહિતના કેટલાક પદાધિકારીઓ મુખ્યમંત્રીનું સ્વાગત કરી શક્યા નહોતા. કાર્યક્રમમાં બનેલી આ ઘટનાની ઉપસ્થિતોમાં ચર્ચા થઈ હતી.
સરસ મેળામાં બહેનો સાથે મુખ્યમંત્રીએ કર્યો સંવાદ
ત્રણ દિવસના સરસ મેળામાં સ્વસહાય જૂથોની મહિલાઓએ મુખ્યમંત્રી સાથે સંવાદ કર્યો હતો. મહિલાઓએ જણાવ્યું હતું કે, મેળામાં સ્ટોલ વિનામૂલ્યે ફાળવવામાં આવ્યા હોવાથી તેમને પોતાનાં ઉત્પાદનોનું પ્રદર્શન અને વેચાણ કરવાની તક મળી છે. આ પ્રકારના મેળા મહિલાઓની હસ્તકલા, ગૃહઉદ્યોગ અને સ્થાનિક ઉત્પાદનોને બજાર પૂરું પાડવામાં મદદરૂપ બને છે.
આ કાર્યક્રમ દ્વારા ગ્રામ્ય મહિલાઓને રોજગાર, વ્યવસાયના વિસ્તરણ અને આર્થિક આત્મનિર્ભરતા માટે નવી તકો ઊભી કરવાનો પ્રયાસ કરવામાં આવ્યો છે.
