દશેરા પર્વને ધ્યાનમાં રાખીને વડોદરા મ્યુનિસિપલ કોર્પોરેશનની ખોરાક શાખા એક્શનમાં આવી છે. શહેરમાં મીઠાઈ અને ફરસાણની દુકાનો પર અલગ-અલગ ટીમો દ્વારા તપાસ હાથ ધરવામાં આવી રહી છે. ખાદ્ય પદાર્થોની ગુણવત્તા જળવાઈ રહે અને નાગરિકોને શુદ્ધ ખોરાક મળે તે હેતુથી આ કાર્યવાહી કરવામાં આવી રહી છે.
ખોરાક શાખાની ટીમો દ્વારા ખંડેરાવ માર્કેટ, સુભાનપુરા, વાઘોડિયા રોડ, અલકાપુરી અને માંજલપુર સહિતના વિસ્તારોમાં દુકાનોનું ચેકિંગ કરવામાં આવ્યું છે. ખાદ્ય પદાર્થો બનાવવા માટે વપરાતા કાચા માલની તપાસ સાથે ગુણવત્તા ચકાસવા નમૂના લેવામાં આવી રહ્યા છે. દુકાનોમાં ગંદકી જોવા મળતાં સંબંધિત વેપારીઓને નોટિસ આપવાની કાર્યવાહી પણ હાથ ધરવામાં આવી છે.
દશેરા નિમિત્તે ફાફડા-જલેબી સહિતની મીઠાઈ અને ફરસાણની માગ વધવાની શક્યતા હોવાથી તંત્ર દ્વારા સ્વચ્છતા અને ગુણવત્તાના નિયમોનું પાલન થાય છે કે નહીં તેના પર નજર રાખવામાં આવી રહી છે. ખોરાક શાખાની તપાસને પગલે નિયમોનું ઉલ્લંઘન કરતા વેપારીઓમાં ફફડાટ ફેલાયો છે.
