હવે તમામ ટ્રકોનું ચેકિંગ નહીં થાય, ઉચ્ચ કક્ષાએથી શંકાસ્પદ ગણાવાયેલા વાહનોની જ તપાસ કરવાની વિચારણા; વેપારીઓને રાહત મળવાની આશા
સ્ટેટ GST વિભાગની હાઈવે પર માલવાહક વાહનોની તપાસ કરતી મોબાઈલ સ્કવોડના નિયમોમાં ટૂંક સમયમાં મોટા ફેરફાર થઈ શકે છે. સૂત્રોના જણાવ્યા અનુસાર, આ અંગે મુખ્ય કમિશનર કક્ષાએ સઘન વિચારણા ચાલી રહી છે. પ્રસ્તાવિત ફેરફાર મુજબ હાઈવે પરથી પસાર થતાં તમામ ટ્રકોનું ચેકિંગ કરવાને બદલે ઉચ્ચ કક્ષાએથી શંકાસ્પદ ગણાવી તપાસ માટે સૂચના અપાયેલા વાહનોની જ તપાસ કરવાની વ્યવસ્થા અમલમાં મૂકવા વિચારણા થઈ રહી છે.
હાલમાં મોબાઈલ સ્કવોડની ટીમો હાઈવે પર વિવિધ માલવાહક વાહનોનું ચેકિંગ કરે છે. આ પ્રક્રિયા દરમિયાન કેટલીક ટ્રકો અને તેમાં રહેલો માલ GST કચેરીઓમાં લાંબા સમય સુધી અટવાઈ રહેતો હોવાની ફરિયાદો ઊઠતી રહી છે. ખાસ કરીને નિયમોનું પાલન કરતા સાચા વેપારીઓને માલની હેરફેરમાં વિલંબ અને અન્ય મુશ્કેલીઓનો સામનો કરવો પડે છે. આ સ્થિતિને ધ્યાનમાં રાખીને ચેકિંગની પદ્ધતિમાં ફેરફાર કરવાની વિચારણા ચાલી રહી હોવાનું સૂત્રો જણાવી રહ્યાં છે.
જો પ્રસ્તાવિત ફેરફારને મંજૂરી મળશે, તો મોબાઈલ સ્કવોડની ટીમોનું કાર્યભારણ ઘટવાની સાથે વેપારીઓને પણ રાહત મળી શકે છે. શંકાસ્પદ વાહનો પર ધ્યાન કેન્દ્રિત કરવાથી તપાસની કામગીરી વધુ લક્ષિત બનશે અને બિનજરૂરી વિલંબ ઘટાડવામાં મદદ મળી શકે છે.
જોકે, આ ફેરફાર અંગે હજુ સત્તાવાર જાહેરાત કરવામાં આવી નથી. હાલની વિચારણા અંતિમ નિર્ણયમાં પરિણમે છે કે નહીં અને નવા નિયમો ક્યારે અમલમાં આવશે તે અંગે સ્પષ્ટતા થવાની બાકી છે.
