મહારાજા હોટેલ નજીક કાર ડિવાઈડર સાથે અથડાઈ પલટી; બે યુવતીઓ સહિત ત્રણનાં કરુણ મોત, એક યુવક ગંભીર
ગાંધીનગરના અડાલજ રોડ પર મહારાજા હોટેલ નજીક દશેરા એટલે કે 20 ઓક્ટોબરની વહેલી સવારે ગમખ્વાર માર્ગ અકસ્માત સર્જાયો હતો. ગાંધીનગરમાં ગરબા રમીને અમદાવાદ પરત ફરી રહેલા ચાર યુવામિત્રોની કાર અચાનક કાબૂ બહાર જતાં રોડના ડિવાઈડર સાથે અથડાઈને પલટી મારી ગઈ હતી. આ ભીષણ અકસ્માતમાં MBBSના છેલ્લા વર્ષમાં અભ્યાસ કરતી વિદ્યાર્થિની સહિત ત્રણ યુવક-યુવતીઓનાં મોત નીપજ્યાં હતાં, જ્યારે એક યુવક ગંભીર રીતે ઇજાગ્રસ્ત થતાં તેને હોસ્પિટલમાં સારવાર માટે ખસેડવામાં આવ્યો હતો.
મળતી માહિતી અનુસાર, કારમાં બે યુવકો અને બે યુવતીઓ સવાર હતાં. ચારેય મિત્રો ગાંધીનગરમાં નવરાત્રિના ગરબા રમીને વહેલી સવારે અમદાવાદ પરત ફરી રહ્યા હતા. આ દરમિયાન અડાલજ રોડ પર મહારાજા હોટેલ નજીક પહોંચતાં કારચાલકે વાહન પરનો કાબૂ ગુમાવ્યો હતો. ત્યારબાદ પૂરઝડપે જતી કાર રોડના ડિવાઈડર સાથે જોરદાર રીતે અથડાઈ હતી અને પલટી મારીને રોડ પર ફંગોળાઈ ગઈ હતી.
અકસમાત એટલો ગંભીર હતો કે કારમાં સવાર એક યુવક અને એક યુવતીને માથાના ભાગે ગંભીર ઈજાઓ પહોંચી હતી. બંનેએ ઘટનાસ્થળે જ જીવ ગુમાવ્યો હતો. અકસ્માતનો અવાજ સાંભળીને આસપાસના લોકો તાત્કાલિક ઘટનાસ્થળે દોડી આવ્યા હતા અને કારમાં ફસાયેલા ઇજાગ્રસ્તોને બહાર કાઢી હોસ્પિટલ પહોંચાડવાની કામગીરી હાથ ધરી હતી.
અન્ય ઇજાગ્રસ્ત યુવક અને યુવતીને હોસ્પિટલમાં ખસેડવામાં આવ્યા હતા, જ્યાં તબીબોએ તાત્કાલિક સારવાર શરૂ કરી હતી. જોકે, સારવાર દરમિયાન ઇજાગ્રસ્ત યુવતીનું પણ મોત નીપજ્યું હતું. આ સાથે અકસ્માતમાં મૃત્યુઆંક ત્રણ પર પહોંચ્યો હતો, જ્યારે ચોથા યુવકની હાલત ગંભીર હોવાનું જણાવાયું હતું.
મૃતકોમાં 25 વર્ષીય આસ્થા નામની યુવતીનો પણ સમાવેશ થાય છે. તે મૂળ રાજકોટની વતની હતી અને અમદાવાદમાં હોસ્ટેલમાં રહીને MBBSના છેલ્લા વર્ષમાં અભ્યાસ કરતી હતી. અન્ય બે મૃતકોની ઓળખ અંગે પોલીસે તપાસ હાથ ધરી છે.
દશેરાના પર્વે બનેલી આ દુર્ઘટનાથી મૃતકોના પરિવારજનો અને મિત્રવર્તુળમાં શોકની લાગણી ફેલાઈ છે. ગરબાની ઉજવણી બાદ ઘરે પરત ફરતી વખતે સર્જાયેલા આ અકસ્માતે માર્ગ સલામતી અને વાહનચાલકોની સાવચેતીનું મહત્ત્વ ફરી એકવાર ઉજાગર કર્યું છે. અકસ્માતના ચોક્કસ કારણો અંગે પોલીસ તપાસ હાથ ધરે તેવી માહિતી આપવામાં આવી છે.
