રીબડા-હિરાસર ગ્રીનફિલ્ડ એરપોર્ટ માર્ગના પ્રોજેક્ટમાં 450 ખેડૂતોની જમીન કપાતની આશંકા; ખોડલધામના ચેરમેન નરેશ પટેલની મધ્યસ્થી બાદ મુખ્યમંત્રીની ખાતરી
રાજકોટઃ રીબડાથી હિરાસર ગ્રીનફિલ્ડ એરપોર્ટને જોડતા માર્ગને સિક્સલેન બનાવવાના પ્રોજેક્ટમાં જમીન સંપાદનનો વિવાદ વકર્યો છે. આ મુદ્દે ખેડૂત પ્રતિનિધિમંડળે મુખ્યમંત્રી ભૂપેન્દ્ર પટેલ સમક્ષ રજૂઆત કરી હતી. ખોડલધામના ચેરમેન નરેશ પટેલની મધ્યસ્થીથી યોજાયેલી બેઠકમાં મુખ્યમંત્રીએ ખેડૂતોને વિશ્વાસમાં લઈને જ પ્રોજેક્ટ આગળ વધારવાની ખાતરી આપી હોવાનું જણાવાયું છે.
ખેડૂત આગેવાન બાબુ નસીતના જણાવ્યા અનુસાર, આ પ્રોજેક્ટને કારણે આશરે 450 ખેડૂતોની જમીન કપાતમાં આવવાની શક્યતા છે. સરકાર દ્વારા સંપાદિત જમીનના જંત્રીભાવ કરતાં ચાર ગણું વળતર આપવાની જાહેરાત કરવામાં આવી હોવા છતાં ખેડૂતોને મોટું આર્થિક નુકસાન થવાની ભીતિ છે. ઉપરાંત, સિક્સલેન માર્ગની ઊંચાઈને કારણે ખેતીની જમીન સુધી પહોંચવા સહિતની મુશ્કેલીઓ ઊભી થઈ શકે તેવી ચિંતા પણ વ્યક્ત કરવામાં આવી છે.
ખેડૂત પ્રતિનિધિઓએ આ મુદ્દે કેન્દ્રના માર્ગ પરિવહન અને ધોરીમાર્ગ મંત્રાલયમાં પણ રજૂઆત કરવાની માંગ કરી છે. મુખ્યમંત્રી સમક્ષ સમગ્ર મામલો રજૂ કરવામાં આવતાં ખેડૂતોની સમસ્યાઓને ધ્યાનમાં રાખીને કાર્યવાહી કરવાની ખાતરી આપવામાં આવી હોવાનું જણાવાયું છે.
નરેશ પટેલની મધ્યસ્થીથી મુખ્યમંત્રી સાથે બેઠક
હિરાસર સિક્સલેન પ્રોજેક્ટના વિવાદમાં ખોડલધામના ચેરમેન નરેશ પટેલે પણ ખેડૂતોનો પક્ષ રજૂ કર્યો હતો. ખેડૂતોની સમસ્યાનો ઉકેલ લાવવા અને વૈકલ્પિક માર્ગ શોધવા માટે તેમણે મુખ્યમંત્રી ભૂપેન્દ્ર પટેલ સાથે ચર્ચા કરી હતી. ત્યારબાદ ખેડૂત પ્રતિનિધિમંડળ સાથે બેઠક યોજાઈ હતી.
રૂડાના 90 મીટરના રોડનો વિકલ્પ સૂચવાયો
ખેડૂત પ્રતિનિધિઓએ હાલના પ્રોજેક્ટના બદલે વૈકલ્પિક માર્ગ અપનાવવાની રજૂઆત કરી હતી. તેમના જણાવ્યા અનુસાર, સૂચિત સિક્સલેન પ્રોજેક્ટથી આશરે એકથી દોઢ કિલોમીટરના અંતરે રૂડાનો 90 મીટરનો રોડ આવેલો છે. જો હિરાસર એરપોર્ટના માર્ગને આ રોડ સાથે જોડવામાં આવે તો જમીન સંપાદન અને ખેડૂતોને થનારા નુકસાનમાં ઘટાડો થઈ શકે છે. આ વિકલ્પ પર વિચારણા કરવામાં આવે તો ખેડૂતોની સમસ્યાનો ઉકેલ આવી શકે તેવી રજૂઆત કરવામાં આવી હતી.
બેઠકમાં ધારાસભ્ય ભાનુબેન બાબરિયા, ભાજપના પ્રદેશ મહામંત્રી પ્રશાંત કોરાટ તથા વિવિધ ગામોના ખેડૂત પ્રતિનિધિઓ હાજર રહ્યા હતા. હવે સરકાર વૈકલ્પિક માર્ગ અંગે શું નિર્ણય લે છે અને ખેડૂતોની જમીનને થતું નુકસાન ટાળવા કે ઘટાડવા માટે કયા પગલાં ભરે છે તેના પર સૌની નજર છે.
