મિથેનોલના ગેરકાયદે સપ્લાયની આંતરરાજ્ય સાંકળ ખુલ્લી પડી; પોલીસ કર્મચારી સહિત 42ની ધરપકડ, 10 આરોપીઓ હજુ ફરાર
ભાવનગર જિલ્લાના વરતેજ વિસ્તારમાં 18 ઓગસ્ટે સર્જાયેલા લઠ્ઠાકાંડના કેસમાં સ્પેશિયલ મોનિટરિંગ સેલ (SMC)એ તપાસ પૂર્ણ કરીને કોર્ટમાં આશરે એક લાખ પાનાની વિશાળ ચાર્જશીટ રજૂ કરી છે. ઝેરી દારૂના સેવનથી સર્જાયેલી આ ઘટનામાં 14 લોકોએ જીવ ગુમાવ્યા હતા. આ કરુણ ઘટનાએ સમગ્ર રાજ્યમાં ભારે ચકચાર જગાવી હતી. હવે તપાસ દરમિયાન એકત્રિત કરવામાં આવેલા દસ્તાવેજી, નાણાકીય અને ટેક્નિકલ પુરાવા સાથે કેસની વિગતો કોર્ટ સમક્ષ મૂકવામાં આવી છે.
42 આરોપીઓની ધરપકડ, 10ની શોધખોળ
લઠ્ઠાકાંડની તપાસ દરમિયાન SMCએ પોલીસ કર્મચારી સહિત કુલ 42 આરોપીઓની ધરપકડ કરી છે. આ ઉપરાંત ગુનામાં સંડોવણી હોવાના આક્ષેપ હેઠળ અન્ય 10 આરોપીઓને વોન્ટેડ જાહેર કરવામાં આવ્યા છે. તપાસમાં ઝેરી કેમિકલ મિથેનોલના સપ્લાય અને તેના ગેરકાયદે નેટવર્ક સાથે સંકળાયેલી આંતરરાજ્ય સાંકળની વિગતો સામે આવી હોવાનું જણાવાયું છે.
મની ટ્રેલથી લઈને CCTV ફૂટેજ સુધીના પુરાવા
કેસની ગંભીરતાને ધ્યાનમાં રાખીને તપાસ એજન્સીએ વિવિધ દિશાઓમાં પુરાવા એકત્રિત કર્યા હતા. આશરે એક લાખ પાનાની ચાર્જશીટમાં આરોપીઓ વચ્ચે થયેલા નાણાકીય વ્યવહારોની વિગતો, મની ટ્રેલ, ઘટનાસ્થળ તથા આસપાસના વિસ્તારોનાં CCTV ફૂટેજ અને કોલ ડિટેઇલ રેકોર્ડ (CDR)નો સમાવેશ કરવામાં આવ્યો છે.
આ ઉપરાંત ફોરેન્સિક સાયન્સ લેબોરેટરી (FSL)ના રિપોર્ટ અને અન્ય ટેક્નિકલ પુરાવાઓ પણ ચાર્જશીટનો ભાગ બનાવવામાં આવ્યા છે. આ પુરાવાઓના આધારે મિથેનોલના પુરવઠા, તેના વ્યવહારો અને કથિત રીતે સંકળાયેલા લોકોની ભૂમિકાની વિગતો કોર્ટ સમક્ષ રજૂ કરવામાં આવી છે.
મિથેનોલ સપ્લાયની આંતરરાજ્ય ચેઇનનો પર્દાફાશ
તપાસ દરમિયાન ઝેરી કેમિકલ મિથેનોલના ગેરકાયદે સપ્લાય સાથે જોડાયેલી આંતરરાજ્ય ચેઇનનો પર્દાફાશ કરવામાં આવ્યો હોવાનો SMCનો દાવો છે. આ નેટવર્ક દ્વારા મિથેનોલનો પુરવઠો કેવી રીતે થતો હતો અને તેમાં કોણ-કોણ સંકળાયેલું હતું તે અંગેની વિગતો તપાસમાં એકત્રિત કરવામાં આવી છે. આ કાર્યવાહી દરમિયાન આશરે રૂ.22 લાખનો મુદ્દામાલ પણ જપ્ત કરવામાં આવ્યો છે.
હવે કોર્ટની કાર્યવાહી પર નજર
વરતેજ લઠ્ઠાકાંડમાં 14 લોકોનાં મોત બાદ જવાબદારો સામે કડક કાર્યવાહી કરવાની માગ ઊઠી હતી. હવે વિશાળ ચાર્જશીટ રજૂ થતાં કેસની ન્યાયિક પ્રક્રિયા આગળ વધશે. કોર્ટમાં રજૂ થયેલા પુરાવાઓની તપાસ અને આરોપીઓ સામેના આક્ષેપોની સુનાવણી દરમિયાન કેસની આગળની દિશા નક્કી થશે. ફરાર જાહેર કરાયેલા 10 આરોપીઓને ઝડપી પાડવા માટેની કાર્યવાહી પણ મહત્ત્વપૂર્ણ રહેશે.










