અભિજીત દીપકનો દાવો: “આ વિદ્યાર્થી અને યુવા શક્તિની જીત”; અન્ય માંગણીઓ યથાવત
નવી દિલ્હી: નીટ પેપર લીક મુદ્દે કેન્દ્રીય શિક્ષણ મંત્રીના રાજીનામાની માંગ સાથે ચાલી રહેલા આંદોલન બાદ ધર્મેન્દ્ર પ્રધાને રાજીનામું આપતાં કોકરોચ જનતા પાર્ટીએ તેને વિદ્યાર્થી અને યુવા શક્તિની જીત ગણાવી છે. પક્ષના સ્થાપક અભિજીત દીપકે આ નિર્ણયને આંદોલનની સફળતા ગણાવતા જણાવ્યું કે આ લડતનો પ્રથમ તબક્કો પૂર્ણ થયો છે.
અભિજીત દીપકના જણાવ્યા અનુસાર, આંદોલનમાં જોડાયેલા હજારો વિદ્યાર્થીઓ અને યુવાનોના સતત પ્રયાસોના પરિણામે આ નિર્ણય આવ્યો છે. તેમણે કહ્યું કે, “આ જીત સમગ્ર વિદ્યાર્થી સમાજની છે.”
તેમણે વધુમાં જણાવ્યું કે તેમની અન્ય માંગણીઓ હજુ પણ યથાવત છે. તેમાં ઘટનાથી પ્રભાવિત પરિવારોને યોગ્ય વળતર આપવાની, આંદોલન દરમિયાન નોંધાયેલા કેસોની સમીક્ષા કરીને પરત ખેંચવાની તથા સંબંધિત જવાબદારો સામે કાયદાકીય કાર્યવાહી કરવાની માંગનો સમાવેશ થાય છે.
ધર્મેન્દ્ર પ્રધાને પોતાના રાજીનામા અંગે જાહેર કરેલા નિવેદનમાં વિદ્યાર્થીઓના હિતને સર્વોચ્ચ ગણાવતા જણાવ્યું કે તેઓ દેશના યુવાનોનું સન્માન કરે છે અને શિક્ષણ ક્ષેત્રે સુધારા માટે સરકારની પ્રતિબદ્ધતા યથાવત રહેશે.
આ દરમિયાન સરકાર તરફથી આ સમગ્ર ઘટનાક્રમ અંગે કોઈ સત્તાવાર વિગતવાર નિવેદન જાહેર કરવામાં આવ્યું નથી. જોકે રાજીનામા બાદ હવે સરકાર બાકી રહેલી માંગણીઓ અને આગામી કાર્યવાહી અંગે શું નિર્ણય લે છે તેના પર રાજકીય તેમજ શૈક્ષણિક વર્તુળોની નજર મંડાઈ છે.
Author: United Times
DAILY NEWS
