રાજકોટથી મોરબી જતી કાર ખજૂરા હોટેલ પાસે ટ્રાન્સફોર્મર સાથે અથડાઈ; એક યુવક ગંભીર રીતે ઈજાગ્રસ્ત, રાજકોટની હોસ્પિટલમાં સારવાર ચાલુ
મોરબી: રાજકોટથી મોરબી તરફ જઈ રહેલી કારનો શનિવારે વહેલી સવારે ખજૂરા હોટેલ નજીક ભયાનક અકસ્માત સર્જાયો હતો. અકસ્માત દરમિયાન કાર 8થી 10 જેટલી ગુલાંટ મારી વીજળીના ટ્રાન્સફોર્મર સાથે અથડાઈ હતી. આ દુર્ઘટનામાં કારમાં સવાર બે યુવકોનાં મોત નીપજ્યાં હતાં, જ્યારે અન્ય એક યુવક ગંભીર રીતે ઈજાગ્રસ્ત થયો હતો.
અકસ્માતમાં કારનો કચ્ચરઘાણ
મળતી માહિતી મુજબ, ખજૂરા હોટેલ નજીક કાર અચાનક પલટી ખાઈ હતી અને અનેક વખત ઊંધી ફરીને ટ્રાન્સફોર્મર સાથે અથડાઈ હતી. અકસ્માતની ભયાનકતા એટલી હતી કે કારમાં સવાર યુવકો બહાર ફંગોળાયા હોવાનું સામે આવ્યું છે. જોકે, કાર કયા કારણોસર કાબૂ બહાર ગઈ અને અકસ્માત કેવી રીતે સર્જાયો તે અંગે હજુ સ્પષ્ટ માહિતી સામે આવી નથી.
અમન બાબરિયા અને પ્રભાત લામકાનાં મોત
આ અકસ્માતમાં અમન બાબરિયા અને પ્રભાત લામકા નામના બે યુવકોનાં મોત થયાં હતાં. જ્યારે જીવણ ડાભી ગંભીર રીતે ઈજાગ્રસ્ત થતાં તેમને સારવાર માટે રાજકોટની હોસ્પિટલમાં ખસેડવામાં આવ્યા હતા, જ્યાં તેમની સારવાર ચાલી રહી છે.
પોલીસની વધુ તપાસ શરૂ
ઘટનાની જાણ થતાં પોલીસ દ્વારા વધુ તપાસ હાથ ધરવામાં આવી છે. અકસ્માતનાં કારણો અને સમગ્ર ઘટનાક્રમ અંગે તપાસ કરવામાં આવી રહી છે. આ મામલે પોલીસે મૃતક અમન સામે ગુનો નોંધ્યો હોવાનું પણ અહેવાલમાં જણાવાયું છે.










