પ્લાસ્ટિક પાઉચના વિકલ્પ તરીકે કાગળ, સેલ્યુલોઝ, ટિન-કાચના પેકેજિંગની શક્યતા
નવી દિલ્હી: પાન મસાલા અને ગુટખાના નાના પ્લાસ્ટિક પાઉચના પેકેજિંગમાં મોટો ફેરફાર થઈ શકે છે. FSSAI દ્વારા પાન મસાલાના પેકેજિંગમાં પ્લાસ્ટિક અને પોલિમર આધારિત સામગ્રીના ઉપયોગ અંગે કડક જોગવાઈઓ સૂચવવામાં આવી છે.
પ્રસ્તાવિત નિયમો અમલમાં આવે તો પોલિથિન, પોલીપ્રોપિલિન, પોલીએસ્ટર, PVC સહિતના પ્લાસ્ટિક આધારિત મટીરિયલ અને લેમિનેટના ઉપયોગ પર નિયંત્રણ આવી શકે છે. એલ્યુમિનિયમ ફોઇલ અને મેટલાઇઝ્ડ લેયર અંગે પણ નિયમોમાં જોગવાઈ કરવામાં આવી છે.
વિકલ્પ તરીકે કાગળ, પેપરબોર્ડ, સેલ્યુલોઝ અને કુદરતી સ્ત્રોત આધારિત સામગ્રીનો ઉપયોગ થઈ શકે છે. આ ઉપરાંત ટિનના કન્ટેનર અને કાચના ડબ્બા પણ વિકલ્પ બની શકે છે.
નાના મલ્ટી-લેયર પાઉચના કારણે સર્જાતા પ્લાસ્ટિક કચરાને ઘટાડવો આ પ્રસ્તાવ પાછળનો મુખ્ય હેતુ માનવામાં આવે છે. જોકે, આ નિર્ણયનો અર્થ પાન મસાલા કે ગુટખા પર પ્રતિબંધ નથી, પરંતુ તેના પેકેજિંગમાં પ્લાસ્ટિકના ઉપયોગને નિયંત્રિત કરવાનો છે.
નવા નિયમો લાગુ થાય તો ઉત્પાદકોને પેકેજિંગ સામગ્રી, મશીનરી અને ઉત્પાદન પ્રક્રિયામાં ફેરફાર કરવો પડી શકે છે, જેના કારણે ઉત્પાદન ખર્ચમાં પણ વધારો થવાની શક્યતા છે.
અંતિમ નિયમો, અમલની તારીખ અને ઉત્પાદકોને મળનારી છૂટછાટ અંગેની સ્થિતિ સત્તાવાર નિર્ણય બાદ સ્પષ્ટ થશે.
