ગુજરાત સરકારે GIDC એસ્ટેટના ડેવલપમેન્ટ નિયમોમાં ફેરફાર કરવાની તૈયારી શરૂ કરી છે. નવા ડ્રાફ્ટ નિયમો મુજબ ઔદ્યોગિક પ્લોટમાં રસ્તાની પહોળાઈ પ્રમાણે ઈમારતોની મહત્તમ ઊંચાઈ અને FSI વધારવાની દરખાસ્ત કરવામાં આવી છે.
હાલની 1.6 FSI વધારીને 3 સુધી કરવાની દરખાસ્ત છે. 18 મીટર કે તેથી ઓછી પહોળાઈ ધરાવતા રસ્તા પર 30 મીટર સુધી, જ્યારે 18 મીટરથી વધુ પહોળા રસ્તા પર 45 મીટર સુધીની ઊંચાઈ ધરાવતી ઔદ્યોગિક ઈમારતોને મંજૂરી મળી શકે છે.
નવા નિયમોમાં બેઝ FSI 1.6 જ રહેશે, પરંતુ પ્રીમિયમ ચૂકવીને વધારાની FSI 2.4 અને 3 સુધી મેળવી શકાશે. વધારાની FSI માટે પ્લોટની કિંમત અથવા પ્રવર્તમાન જંત્રી દર, બેમાંથી જે વધારે હોય તેના આધારે 40% અને 50% ચાર્જ વસૂલવાની દરખાસ્ત છે.
ઉદ્યોગ જગતે સરકારના આ પ્રસ્તાવને આવકાર્યો છે. GCCIના જણાવ્યા મુજબ ઉદ્યોગકારો લાંબા સમયથી FSI વધારવાની માંગ કરી રહ્યા હતા. ખાસ કરીને વર્ટિકલ મેન્યુફેક્ચરિંગ પ્રક્રિયા ધરાવતા ઉદ્યોગોને આ નિર્ણયથી મોટો ફાયદો થઈ શકે છે.
GIDCમાં દાયકાઓ જૂના 1.6 FSIના નિયમમાં ફેરફારથી ઉદ્યોગોને વધુ જગ્યાનો ઉપયોગ કરવાની તક મળશે અને ઊંચી ઔદ્યોગિક ઈમારતોના નિર્માણને વેગ મળી શકે છે.
