ગુજરાત પોલીસે ન્યૂ નેક્સ્ટ જનરેશન ચલણ સિસ્ટમનો અમલ શરૂ કર્યો છે. નવી વ્યવસ્થામાં ટ્રાફિક નિયમોના ભંગ બદલ ઈ-ચલણ, તેની ચૂકવણી અને ફરિયાદ કરવાની પ્રક્રિયાને વધુ સરળ અને પારદર્શક બનાવવામાં આવી છે.
નવા નિયમ મુજબ ઈ-ચલણ જનરેટ થયા બાદ વાહનમાલિકને 45 દિવસનો સમય મળશે. આ સમયગાળા દરમિયાન દંડ ભરી શકાય છે અથવા ચલણ સામે ઓનલાઈન વાંધો નોંધાવી શકાય છે.
વાંધો હોય તો પરિવહન પોર્ટલ પર મોબાઈલ નંબર અપડેટ કરીને જરૂરી દસ્તાવેજો અને પુરાવા સાથે ફરિયાદ નોંધાવવાની રહેશે. પોલીસ વિભાગ દ્વારા ફરિયાદની તપાસ કરી 30 દિવસમાં નિકાલ કરવામાં આવશે.
ચલણ જનરેટ થવાથી લઈને ફરિયાદના નિકાલ સુધીની સમગ્ર પ્રક્રિયા મહત્તમ 75 દિવસમાં પૂર્ણ કરવામાં આવશે. જો ચલણ યોગ્ય ઠરે અને ત્યારબાદ પણ દંડ ભરવામાં નહીં આવે તો લાયસન્સ અને વાહન રજિસ્ટ્રેશન સંબંધિત તમામ સેવાઓ સ્થગિત કરી દેવામાં આવશે.
પોલીસની કાર્યવાહીથી અસંતુષ્ટ વાહનમાલિકને કોર્ટમાં અપીલ કરવાની પણ તક મળશે. જોકે, કોર્ટમાં જવા માટે ચલણની 50% રકમ જમા કરાવવી પડશે.
નવા નિયમનો હેતુ ટ્રાફિક નિયમોનું પાલન વધારવા અને ચલણની પ્રક્રિયામાં પારદર્શિતા લાવવાનો છે.
