ગુજરાત સરકાર સોલાર ઊર્જાને વધુ પ્રોત્સાહન આપવા માટે મહત્વાકાંક્ષી યોજના પર વિચારણા કરી રહી છે. પ્રસ્તાવિત યોજના હેઠળ 50 ચોરસ મીટરથી નાના મકાનોમાં મફતમાં સોલાર સિસ્ટમ લગાવી આપવાની યોજના છે. આ યોજના શહેરો તેમજ ગ્રામ્ય વિસ્તારોમાં લાગુ કરવાની વિચારણા છે અને ટૂંક સમયમાં પાયલોટ પ્રોજેક્ટ જાહેર થઈ શકે છે.
સરકારના એક વરિષ્ઠ અધિકારીના જણાવ્યા અનુસાર, આ યોજના અમલમાં આવે તો ગરીબ અને મધ્યમ વર્ગના પરિવારોને મોટી રાહત મળી શકે છે. લાભાર્થીના મકાન પર સોલાર સિસ્ટમ મફતમાં ઇન્સ્ટોલ કરવામાં આવશે અને મકાન માલિકે કોઈ ખર્ચ કરવો નહીં પડે.
સોલારથી બનેલી વીજળી ગ્રીડમાં જશે
પ્રસ્તાવિત યોજના હેઠળ મકાન પર લગાવવામાં આવેલી સોલાર સિસ્ટમથી ઉત્પન્ન થતી વીજળી રાજ્યની વીજ ગ્રીડમાં ટ્રાન્સફર કરવામાં આવશે. ત્યારબાદ આ વીજળીનો ઉપયોગ ઉદ્યોગો, કોમર્શિયલ એકમો તથા અન્ય વીજ ગ્રાહકો માટે કરી શકાશે.
રૂફટોપ સોલારમાં ગુજરાત અગ્રેસર
રૂફટોપ સોલાર ઇન્સ્ટોલેશનમાં ગુજરાત દેશના અગ્રણી રાજ્યોમાં સામેલ છે. રહેણાંક મકાનોના વીજ બિલમાં રાહત આપવા માટે સૂર્ય ગુજરાત યોજના પણ અમલમાં છે. ગયા વર્ષે રાજ્યમાં 1,37,914 રૂફટોપ સોલાર સિસ્ટમ લગાવવામાં આવી હતી, જેની સરેરાશ ક્ષમતા 550.19 મેગાવોટ હતી.
ગુજરાતમાં રૂફટોપ સોલાર સિસ્ટમની સંખ્યા 11 લાખથી વધુ છે. રાજ્યની રૂફટોપ સોલાર ક્ષમતા 6,412.80 મેગાવોટ છે.
રિન્યુએબલ એનર્જીમાં પણ ગુજરાતનું મોટું યોગદાન
ગુજરાતે રિન્યુએબલ એનર્જીના ક્ષેત્રમાં પણ મહત્વપૂર્ણ સ્થાન મેળવ્યું છે. ડિસેમ્બર 2025ની સ્થિતિ મુજબ રાજ્યની કુલ સૌર ઊર્જા ક્ષમતા 25,529.40 મેગાવોટ હતી. તેમાં ગ્રાઉન્ડ સોલાર, રૂફટોપ, હાઇબ્રિડ અને ઓફ-ગ્રીડ પ્રોજેક્ટનો સમાવેશ થાય છે.
રૂફટોપ સોલાર ક્ષમતામાંથી 2,073.65 મેગાવોટ સૂર્ય ગુજરાત યોજના, 1,913 મેગાવોટ PM સૂર્યઘર યોજના અને 2,267.04 મેગાવોટ અન્ય યોજનાઓ હેઠળ સ્થાપિત થયેલી છે.
કેન્દ્ર સરકારે 2030 સુધીમાં 520 ગીગાવોટ રિન્યુએબલ એનર્જી ક્ષમતા ઊભી કરવાનો લક્ષ્યાંક રાખ્યો છે. ગુજરાતે પણ રાજ્યમાં 100 ગીગાવોટ રિન્યુએબલ એનર્જી ક્ષમતાનું લક્ષ્યાંક નક્કી કર્યું છે.
