ગુજરાત સરકાર વેપાર-ધંધાને સરળ બનાવવા માટે ‘ગુજરાત શોપ્સ એન્ડ એસ્ટાબ્લિશમેન્ટ એક્ટ, 2019’માં મહત્વના સુધારા કરવાની તૈયારીમાં છે. આગામી વિધાનસભા સત્રમાં સરકાર આ માટે ‘ઓમ્નિબસ બિલ’ રજૂ કરશે. આ સુધારાઓનો હેતુ નાના-મોટા વેપારીઓ પરનો કાયદાકીય અને કાગળિયાનો બોજ ઘટાડવાનો છે.
મહિલાઓને સમગ્ર ગુજરાતમાં નાઇટ શિફ્ટની મંજૂરી
નવા સુધારા હેઠળ મહિલાઓને નાઇટ શિફ્ટમાં કામ કરવાની મંજૂરી અંગે મોટો ફેરફાર કરવામાં આવશે. હાલ મહિલાઓને માત્ર મહાનગરપાલિકા વિસ્તારની અંદર જ નાઇટ શિફ્ટમાં કામ કરવાની છૂટ છે.
નવો નિયમ અમલમાં આવ્યા બાદ જરૂરી સુરક્ષા જોગવાઈઓનું પાલન કરીને સમગ્ર ગુજરાતમાં મહિલાઓ નાઇટ શિફ્ટમાં કામ કરી શકશે. આ નિર્ણયથી ખાસ કરીને વિવિધ ક્ષેત્રોમાં મહિલાઓ માટે રોજગારીની તકો વધવાની શક્યતા છે.
10 નહીં, હવે 20 કર્મચારીઓ સુધી લાયસન્સમાંથી મુક્તિ
નાના વેપારીઓને પણ સરકાર મોટી રાહત આપવા જઈ રહી છે. અત્યાર સુધી 10 સુધી કર્મચારીઓ ધરાવતી દુકાનો અને સંસ્થાઓને લાયસન્સમાંથી મુક્તિ મળતી હતી.
હવે આ મર્યાદા વધારીને 20 કર્મચારીઓ કરવાની દરખાસ્ત છે. એટલે કે 20 સુધી કર્મચારીઓ ધરાવતા નાના વેપારીઓને લાયસન્સ મેળવવાની પ્રક્રિયામાંથી રાહત મળશે.
દુકાનોમાં 12 કલાકની શિફ્ટની પણ વિચારણા
આ ઉપરાંત ફેક્ટરી એક્ટની તર્જ પર દુકાનો અને વ્યાપારી સંસ્થાઓમાં 12 કલાકની શિફ્ટ દાખલ કરવાની પણ વિચારણા ચાલી રહી છે. જોકે કર્મચારીઓ માટે અઠવાડિયાના કુલ 48 કલાકની કાયદાકીય મર્યાદા યથાવત રહેશે.
સરકારનું માનવું છે કે કર્મચારીઓની સુરક્ષા અને અધિકારો જાળવીને નિયમોમાં સરળતા લાવવામાં આવે તો ગુજરાતમાં રોજગારી, વેપાર અને રોકાણને વેગ મળી શકે છે.
