અમદાવાદ: રક્ષાબંધનના તહેવાર દરમિયાન રાખડી, મીઠાઈ અને ગિફ્ટની ઓનલાઈન ખરીદી વધતાં સાયબર ઠગોએ પણ લોકોને નિશાન બનાવવાનું શરૂ કર્યું છે. નકલી વેબસાઇટ, સોશિયલ મીડિયા જાહેરાતો અને WhatsApp લિંક્સ દ્વારા સસ્તી ખરીદી, ગિફ્ટ અને કેશબેકની લાલચ આપીને લોકો સાથે છેતરપિંડી કરવામાં આવી રહી છે.
ઠગોની નવી નવી તરકીબો
સાયબર ઠગો જાણીતી બ્રાન્ડ જેવી દેખાતી નકલી વેબસાઇટ અને સોશિયલ મીડિયા જાહેરાતો બનાવી ભારે ડિસ્કાઉન્ટની લાલચ આપે છે. પેમેન્ટ લીધા બાદ માલ પહોંચાડવામાં આવતો નથી.
આ ઉપરાંત ‘રક્ષાબંધન ગિફ્ટ ક્લેમ કરો’ અથવા કેશબેક મેળવો જેવી લાલચ આપીને WhatsApp પર નકલી લિંક્સ મોકલવામાં આવે છે. કેટલીક વખત UPI કલેક્ટ રિક્વેસ્ટ મોકલીને તેને મંજૂર કરાવવાનો પ્રયાસ થાય છે.
ફેક કુરિયર કોલ પણ છેતરપિંડીની સામાન્ય રીત બની છે. પાર્સલ અટક્યું હોવા કે સરનામું અપડેટ કરવાના બહાને OTP મેળવવાનો અથવા માલવેર ધરાવતી ટ્રેકિંગ લિંક મોકલવાનો પ્રયાસ થઈ શકે છે.
ઓનલાઈન ખરીદી વખતે આટલી સાવચેતી રાખો
માત્ર જાણીતી અને વિશ્વસનીય વેબસાઇટ પરથી જ ખરીદી કરો.
વેબસાઇટનું URL, રિવ્યૂ, રેટિંગ અને રિટર્ન પોલિસી તપાસો.
SMS અથવા WhatsApp પર આવેલી અજાણી ટ્રેકિંગ લિંક પર ક્લિક ન કરો.
ઓર્ડરનું સ્ટેટસ હંમેશા સત્તાવાર એપ અથવા વેબસાઇટના My Orders વિભાગમાંથી તપાસો.
કુરિયર માટે સરનામું, પિનકોડ અને મોબાઇલ નંબર યોગ્ય રીતે લખો.
OTP, UPI PIN કે બેંકની ગુપ્ત માહિતી કોઈની સાથે શેર ન કરો.
રિફંડના નામે કોઈ અજાણી એપ અથવા સ્ક્રીન-શેરિંગ એપ ડાઉનલોડ ન કરો.
છેતરપિંડી થાય તો તરત પગલાં લો
જો સાયબર ફ્રોડનો ભોગ બનશો તો ગભરાયા વગર તાત્કાલિક તમારી બેંકને જાણ કરો અને જરૂરી હોય તો કાર્ડ અથવા એકાઉન્ટ બ્લોક કરાવો. OTP, UPI PIN અને પાસવર્ડ બદલી નાખો.
સાથે જ ટ્રાન્ઝેક્શનની રસીદ, ચેટ, ફોન નંબર, લિંક અને સ્ક્રીનશોટ જેવા તમામ પુરાવા સાચવી રાખો. સાયબર ફ્રોડમાં જેટલી ઝડપથી કાર્યવાહી કરવામાં આવે, તેટલી રકમ અટકાવવાની શક્યતા વધી શકે છે.
