કેનાલ પાસે અવાવરું સ્થળેથી 1,157 બોટલ દારૂ જપ્ત : રૂ.1.76 લાખથી વધુનો મુદ્દામાલ કબજે
સુરેન્દ્રનગર જિલ્લાના પાટડી તાલુકાના ચિકાસર ગામ નજીક કેનાલ પાસેના અવાવરું સ્થળેથી પોલીસે વિદેશી દારૂનો મોટો જથ્થો ઝડપી પાડ્યો છે. સુરેન્દ્રનગર એસઓજી, એલસીબી અને પેરોલ ફર્લો સ્કવોડની ટીમે પેટ્રોલિંગ દરમિયાન મળેલી ચોક્કસ બાતમીના આધારે દરોડો પાડ્યો હતો.
દરોડા દરમિયાન પોલીસે અલગ-અલગ બ્રાન્ડની કુલ 1,157 બોટલ વિદેશી દારૂ તથા ચપલા સહિતનો જથ્થો કબજે કર્યો હતો. પોલીસે જપ્ત કરાયેલા કુલ મુદ્દામાલની કિંમત રૂ.1,76,652 આંકી છે.
આરોપી સામે ગુનો, હાલ ફરાર
આ મામલે ચિકાસર ગામના યુનુસશા પુંજાશા દીવાન સામે દસાડા પોલીસ મથકમાં પ્રોહિબિશન એક્ટ હેઠળ ગુનો નોંધવામાં આવ્યો છે. પોલીસના જણાવ્યા મુજબ આરોપી હાલ ફરાર છે અને તેને ઝડપી પાડવા માટે શોધખોળ હાથ ધરવામાં આવી છે.
અવાવરું સ્થળે દારૂનો જથ્થો છુપાવ્યો
પોલીસ તપાસમાં કેનાલ નજીકના અવાવરું સ્થળેથી દારૂનો જથ્થો મળી આવ્યો હતો. મોટી સંખ્યામાં વિદેશી દારૂની બોટલો મળી આવતા પોલીસે સમગ્ર જથ્થો કબજે કરી વધુ તપાસ શરૂ કરી છે. દારૂ ક્યાંથી લાવવામાં આવ્યો હતો અને તેની પાછળ અન્ય કોઈ વ્યક્તિ સંકળાયેલી છે કે કેમ તે અંગે પણ તપાસ કરવામાં આવી રહી છે.
