ઉનાળુ વેકેશન, જન્માષ્ટમી અને દિવાળી સુધી પાર્ક શરૂ કરવાની જાહેરાતો અધૂરી રહી; જમીનના માપમાં તફાવત આવતાં ખર્ચ વધ્યો, સ્ટેન્ડિંગ કમિટીએ દરખાસ્ત પરત મોકલી તપાસના આપ્યા આદેશ
રાજકોટ: રાજકોટ મહાનગરપાલિકાનો ડ્રીમ પ્રોજેક્ટ ગણાતો લાયન સફારી પાર્ક તૈયાર થવામાં વિલંબ થઈ રહ્યો છે. પ્રદ્યુમન પાર્ક ઝૂની પાછળ આશરે 38 હેક્ટર વિસ્તારમાં મીની સાસણ ગીરની તર્જ પર આ સફારી પાર્ક બનાવવાનું આયોજન કરવામાં આવ્યું છે. જોકે, ઉનાળુ વેકેશન, જન્માષ્ટમી અને ત્યારબાદ દિવાળીની રજાઓ દરમિયાન પાર્ક શરૂ કરવાની વાતો વચ્ચે પણ પ્રોજેક્ટ પૂર્ણ થઈ શક્યો નથી. જમીનના માપમાં તફાવત સામે આવતાં વધારાના રૂ. 7.94 કરોડના ખર્ચનો મુદ્દો ઊભો થયો છે. આ વધારાના ખર્ચની દરખાસ્તને સ્ટેન્ડિંગ કમિટીએ મંજૂરી ન આપતાં કામની ગતિ અટકી હોવાનું સામે આવ્યું છે.
જમીનના માપમાં તફાવતથી વધ્યો ખર્ચ
મનપાએ પ્રોજેક્ટ તૈયાર કર્યો ત્યારે એન્ટ્રન્સ પ્લાઝા અને વિઝિટર એમેનિટીઝ માટે ટીપી વિભાગ દ્વારા 20,000 ચોરસ મીટર જમીનનું આયોજન કરવામાં આવ્યું હતું. જોકે, કોન્ટ્રાક્ટર દ્વારા સ્થળ પર જમીનની માપણી કરવામાં આવતાં 30,185 ચોરસ મીટર જમીન હોવાનું સામે આવ્યું હતું. આ રીતે મૂળ આયોજન કરતાં વધુ જમીનનો મુદ્દો ઊભો થતાં પ્રોજેક્ટના ખર્ચમાં વધારો થયો છે.
આ વધારાના કામ માટે રૂ. 7.94 કરોડનો ખર્ચ થવાનો અંદાજ રજૂ કરવામાં આવ્યો હતો. જોકે, સ્ટેન્ડિંગ કમિટીએ આશરે બે મહિના પહેલાં આ દરખાસ્તને મંજૂરી આપવાને બદલે તપાસના આદેશ આપ્યા હતા. વધારાના ખર્ચ અંગે શાસકોની મંજૂરી ન મળતાં આગળની કામગીરી પર અસર પડી છે.
રૂ. 44 કરોડના ખર્ચે બની રહ્યો છે સફારી પાર્ક
પ્રદ્યુમન પાર્ક ઝૂની પાછળ આશરે 38 હેક્ટર વિસ્તારમાં મૂળ રૂ. 44 કરોડના ખર્ચે લાયન સફારી પાર્ક બનાવવાની યોજના છે. પ્રોજેક્ટ પૂર્ણ થયા બાદ પ્રવાસીઓ ખુલ્લી જીપમાં સફારીનો આનંદ માણી શકશે અને ખુલ્લા વાતાવરણમાં સિંહ સહિતનાં પ્રાણીઓ નિહાળી શકશે. શરૂઆતના તબક્કામાં ઝૂમાંથી સિંહ અને વાઘ જેવા પ્રાણીઓને સફારી પાર્કમાં રાખવાની યોજના હોવાનું જણાવાયું છે.
આ પ્રોજેક્ટ રાજકોટ સહિત સૌરાષ્ટ્રના પ્રવાસન માટે નવું આકર્ષણ બની શકે તેમ છે. ખાસ કરીને બહારગામથી આવતા સહેલાણીઓ માટે પણ આ સ્થળ પ્રવાસનના નવા કેન્દ્ર તરીકે વિકસાવવાની મનપાની યોજના છે.
કમ્પાઉન્ડ વોલથી લઈને વોચ ટાવર સુધીની સુવિધાઓ
સફારી પાર્કમાં પ્રાણીઓ અને પ્રવાસીઓની સુરક્ષા માટે કમ્પાઉન્ડ વોલ, નાઇટ શેલ્ટર, વોચ ટાવર અને વોટર પોઇન્ટ જેવી સુવિધાઓ ઊભી કરવામાં આવી છે. આ ઉપરાંત એન્ટ્રી પ્લાઝા, પાર્કિંગ, લાઉન્જ, ફૂડ કોર્ટ અને ટિકિટ કાઉન્ટરનું કામ પણ આયોજનમાં સામેલ છે.
પ્રવાસીઓ માટે જીપ સફારી, ઇલેક્ટ્રિક વાહનો અને બાળકો માટે પ્લે એરિયા બનાવવાની યોજના છે. સિંહોની સુરક્ષા માટે પાંચ મીટર ઊંચી ફેન્સિંગ ઊભી કરવાની તેમજ પ્રવાસીઓ માટે રેસ્ટિંગ શેડ અને અન્ય સુવિધાઓ વિકસાવવાની પણ જોગવાઈ કરવામાં આવી છે.
પ્રોજેક્ટ ક્યારે પૂર્ણ થશે તે અંગે અનિશ્ચિતતા
લાયન સફારી પાર્કને રાજકોટના પ્રવાસન ક્ષેત્ર માટે મહત્વપૂર્ણ પ્રોજેક્ટ માનવામાં આવે છે. જોકે, વારંવાર જાહેર કરવામાં આવેલી સમયમર્યાદા છતાં કામ પૂર્ણ ન થતાં પ્રોજેક્ટની કામગીરી સામે સવાલો ઊભા થયા છે. જમીનના માપમાં તફાવત અને વધારાના ખર્ચની મંજૂરીનો મુદ્દો ઉકેલાયા બાદ જ બાકીનું કામ આગળ વધી શકશે. હવે મનપા તપાસ પૂર્ણ કરીને વધારાના ખર્ચ અંગે શું નિર્ણય લે છે અને સફારી પાર્ક ક્યારે પ્રવાસીઓ માટે ખુલ્લો મૂકવામાં આવે છે તેના પર સૌની નજર રહેશે.
