2027ની તૈયારીનો ધમધમાટ : અમદાવાદમાં RSS-ભાજપ-સરકારની સમન્વય બેઠક
રાષ્ટ્રીય સ્વયંસેવક સંઘ (RSS)ની વાર્ષિક પ્રતિનિધિ સભા વિશાખાપટ્ટનમમાં પૂર્ણ થયા બાદ હવે ગુજરાતમાં સંગઠનાત્મક મંથન શરૂ થયું છે. અમદાવાદમાં મણિનગર સ્થિત ડૉ. હેડગેવાર ભવન ખાતે સંઘ, ભાજપ અને રાજ્ય સરકારના આગેવાનો વચ્ચે બે દિવસીય સમન્વય બેઠક યોજાઈ રહી છે. આગામી દિવસોનો રોડમેપ તેમજ 2027ની ગુજરાત વિધાનસભા ચૂંટણીને ધ્યાનમાં રાખીને સંગઠન અને સરકાર વચ્ચે વધુ સારા સંકલન અંગે ચર્ચા થઈ રહી છે.
આ બેઠકમાં સંઘના સહસરકાર્યવાહ અરુણકુમાર વિશેષરૂપે ગુજરાત આવ્યા છે. તેઓ વિશાખાપટ્ટનમથી સીધા અમદાવાદ પહોંચ્યા હોવાનું જાણવા મળે છે. પ્રથમ તબક્કાની બેઠકમાં ભાજપ પ્રદેશ પ્રમુખ જગદીશ વિશ્વકર્મા, સંગઠન મહામંત્રી રત્નાકર, કેબિનેટ મંત્રી જીતુભાઈ વાઘાણી, ઋષિકેશ પટેલ, કનુભાઈ દેસાઈ અને પ્રફુલ પાનસેરિયા સહિતના આગેવાનો હાજર રહ્યા હતા. નાયબ મુખ્યમંત્રી હર્ષ સંઘવી પણ બેઠકમાં જોડાય તેવી શક્યતા છે.
છ મહત્વના મુદ્દાઓ પર મંથન
બે દિવસીય બેઠક દરમિયાન આશરે છ મહત્વપૂર્ણ મુદ્દાઓ પર ચર્ચા થઈ રહી છે. સંઘ દ્વારા ગુજરાતની વર્તમાન સ્થિતિ અંગે ગ્રાઉન્ડ રિપોર્ટ તૈયાર કરવામાં આવ્યો છે. આ રિપોર્ટમાં રાજ્યના વિવિધ વિસ્તારોમાં લોકો સામેના પ્રશ્નો, સામાજિક સ્થિતિ અને સરકારની કામગીરી અંગે મળેલા ફીડબેકને ચર્ચામાં મૂકવામાં આવ્યો છે.
બેઠકમાં સરકાર, ભાજપનું સંગઠન અને સંઘ સાથે સંકળાયેલી વિવિધ સંસ્થાઓ વચ્ચે વધુ સારા સંકલન પર ખાસ ભાર મૂકવામાં આવ્યો છે. જમીની સ્તરે મળતો ફીડબેક ઝડપથી સંગઠન અને સરકાર સુધી પહોંચે તથા તેના આધારે જરૂરી પગલાં લઈ શકાય તે અંગે પણ ચર્ચા થઈ રહી છે.
યુવાઓ અને વિદ્યાર્થીઓ પર ખાસ ધ્યાન
સંઘની વિદ્યાર્થી પાંખ અખિલ ભારતીય વિદ્યાર્થી પરિષદ (ABVP)ને ગુજરાતમાં વધુ સક્રિય બનાવવા અંગે પણ ચર્ચા થઈ હોવાનું જાણવા મળે છે. ખાસ કરીને યુવાનો અને વિદ્યાર્થીઓ સાથે જોડાયેલા પ્રશ્નોમાં અન્ય સંગઠનો સક્રિય થાય તે પહેલાં વિદ્યાર્થી પરિષદ સ્થાનિક મુદ્દાઓને આગળ ધપાવે અને વિદ્યાર્થીઓ સાથે સીધો સંપર્ક વધારે તે અંગે ભાર મૂકાયો હોવાનું કહેવાય છે.
દેશના અન્ય કેટલાક રાજ્યોમાં યુવા વર્ગમાં જોવા મળતા નવા સામાજિક અને રાજકીય વલણો અંગે પણ બેઠકમાં ચર્ચા થઈ છે. ગુજરાતમાં તેની અસર મર્યાદિત હોવાનું નોંધાયું હોવા છતાં આગામી સમયમાં યુવા પેઢી સાથે વધુ મજબૂત જોડાણ જાળવવાની જરૂરિયાત વ્યક્ત કરવામાં આવી છે.
સરકાર-સંગઠન વચ્ચે વધુ તાલમેલ પર ભાર
2027ની વિધાનસભા ચૂંટણીને ધ્યાનમાં રાખીને સરકાર અને સંગઠન વચ્ચે સતત સંકલન જળવાઈ રહે તે અંગે પણ બેઠકમાં ચર્ચા થઈ રહી છે. સંઘના પ્રતિનિધિઓ પાસેથી મળતા જમીની ફીડબેકને સરકાર સુધી ઝડપથી પહોંચાડવા અને લોકોના પ્રશ્નોના ઉકેલ માટે ત્વરિત કામગીરી થાય તે જરૂરી હોવાનું ચર્ચાયું છે.
આ બેઠકને આગામી વિધાનસભા ચૂંટણી પહેલાં સંઘ, ભાજપ અને સરકાર વચ્ચેના સંકલનને વધુ મજબૂત બનાવવાના પ્રયાસ તરીકે જોવામાં આવી રહી છે. બેઠકનો બીજો તબક્કો આજે પણ ચાલુ રહેશે અને તેમાં રાજ્યના વિવિધ સંગઠનાત્મક તથા સામાજિક મુદ્દાઓ પર વધુ ચર્ચા થવાની શક્યતા છે.
