લાઠી તાલુકાના દુધાળા ગામે પદ્મશ્રી સવજીભાઈ ધોળકિયા દ્વારા નિર્મિત ગુજરાત ગૌરવ સરોવરનું કેન્દ્રીય ગૃહમંત્રી અમિત શાહના હસ્તે ભવ્ય લોકાર્પણ કરવામાં આવ્યું હતું. ગુજરાતમાં જળસંચય અને જળસંરક્ષણની કામગીરીને વધુ વેગ આપવાના ઉદ્દેશથી તૈયાર કરાયેલા આ સરોવરના લોકાર્પણ પ્રસંગે મોટી સંખ્યામાં લોકો ઉપસ્થિત રહ્યા હતા.
અમિત શાહનું હેલિકોપ્ટર દુધાળા ખાતે લેન્ડ થતાં તેમનું ભવ્ય સ્વાગત કરવામાં આવ્યું હતું. તેમની સાથે રાજ્યના ગૃહમંત્રી હર્ષ સંઘવી પણ ઉપસ્થિત રહ્યા હતા. આ પ્રસંગે ઊર્જામંત્રી કૌશિક વેકરિયા, કૃષિમંત્રી જીતુ વાઘાણી, રાજ્યસભાના સાંસદ ગોવિંદ ધોળકિયા, સાંસદ ભરત સુતરીયા, ધારાસભ્ય મહેશ કસવાળા, ધારાસભ્ય હીરા સોલંકી સહિતના આગેવાનો અને મહાનુભાવો હાજર રહ્યા હતા.
23 કરોડ લીટર પાણીનો સંગ્રહ થશે
ગુજરાત ગૌરવ સરોવર આશરે 80 હજાર ચોરસ ફૂટ વિસ્તારમાં બનાવવામાં આવ્યું છે અને તેમાં અંદાજે 23 કરોડ લીટર પાણીનો સંગ્રહ થઈ શકે છે. રૂ.4 કરોડથી વધુના ખર્ચે તૈયાર થયેલા આ સરોવરથી દુધાળા સહિત આસપાસના વિસ્તારોમાં વરસાદી પાણીનો સંગ્રહ થશે અને ભૂગર્ભ જળસ્તરમાં વધારો થવાની આશા છે.
લોકાર્પણ પ્રસંગે અમિત શાહે જળસંચયના મહત્વ પર ભાર મૂકતા જણાવ્યું હતું કે, વર્ષ 2001 બાદ ગુજરાતમાં જળસંચયની કામગીરીને સતત વેગ મળ્યો છે. ગામેગામ ચેકડેમ, તળાવો અને કૂવા સહિતના માધ્યમોથી વરસાદી પાણીનો સંગ્રહ કરવામાં આવી રહ્યો છે. તેના પરિણામે ગુજરાતના અનેક વિસ્તારોમાં ભૂગર્ભ જળસ્તરમાં નોંધપાત્ર સુધારો થયો છે અને રાજ્ય દુષ્કાળની પરિસ્થિતિમાંથી બહાર આવ્યું છે.
ગુજરાત ગૌરવ સરોવર બન્યા બાદ આસપાસના વિસ્તારમાં પણ પાણીના સ્તરમાં વધારો થયો હોવાનું જણાવાયું હતું. સરોવરના કારણે આશરે 500 ફૂટ સુધીના વિસ્તારમાં ભૂગર્ભ જળસ્તર વધ્યું હોવાનું જણાવાયું છે. પાણીની ઉપલબ્ધતા વધતાં ખેતીને ફાયદો થયો છે અને ખેડૂતોને તેનો સીધો લાભ મળી રહ્યો છે.
સવજીભાઈ ધોળકિયાના જળસંચયના પ્રયાસો
પદ્મશ્રી સવજીભાઈ ધોળકિયા દ્વારા ગુજરાત સહિત દેશના વિવિધ વિસ્તારોમાં જળસંચય માટે કામગીરી કરવામાં આવી રહી છે. અત્યાર સુધીમાં આશરે 208 જેટલાં સરોવરોનું નિર્માણ કરવામાં આવ્યું હોવાનું જણાવાયું હતું. જળસંચય અને સમાજસેવાના ક્ષેત્રે તેમના યોગદાન બદલ ભારત સરકાર દ્વારા તેમને પદ્મશ્રીથી સન્માનિત કરવામાં આવ્યા છે.
દુધાળા ખાતે યોજાયેલા કાર્યક્રમને લઈને સ્થાનિક લોકોમાં પણ ભારે ઉત્સાહ જોવા મળ્યો હતો. ગુજરાત ગૌરવ સરોવર આવનારા સમયમાં જળસંચય અને ખેતી માટે મહત્વપૂર્ણ સાબિત થશે તેવી આશા વ્યક્ત કરવામાં આવી હતી.
જન્માષ્ટમીના કારણે અમિત શાહે ગાંધીનગરનો કાર્યક્રમ રદ કર્યો
અમદાવાદ, તા.28 : કેન્દ્રીય ગૃહમંત્રી અમિત શાહે તા.4 ઓગસ્ટે જન્માષ્ટમીના દિવસે ગાંધીનગર ટાઉનહોલ ખાતે યોજાનારો પોતાનો કાર્યક્રમ રદ કરવાનો નિર્ણય લીધો છે. જન્માષ્ટમી નિમિત્તે ગાંધીનગર વિસ્તારમાં ભવ્ય શોભાયાત્રા યોજાવાની છે અને આ શોભાયાત્રા કાર્યક્રમના સ્થળની આસપાસથી પસાર થવાની હતી.
સામાન્ય લોકોને કોઈ પ્રકારની અગવડ ન પડે અને લોકો જન્માષ્ટમીનો તહેવાર ધામધૂમથી ઉજવી શકે તે હેતુથી અમિત શાહે કાર્યક્રમ રદ કર્યો હોવાનું જણાવાયું છે. આ અંગે ઈસ્કોન દ્વારા તેમને પત્ર લખવામાં આવ્યો હતો. પત્ર મળ્યા બાદ અમિત શાહે તાત્કાલિક પોતાનો કાર્યક્રમ રદ કરતાં કૃષ્ણભક્તોમાં આનંદની લાગણી ફેલાઈ હતી.
