જુનિયર ટપુ અને જુનિયર લાલો તરીકે જાણીતા જેનિસ હવે શ્રીકૃષ્ણની ભૂમિકામાં જોવા મળશે
રાજકોટ: રાજકોટના યુવા કલાકાર જેનિસ બુધ્ધદેવે નાની ઉંમરે પોતાની આગવી ઓળખ ઉભી કરી છે. જુનિયર ટપુ અને જુનિયર લાલો તરીકે જાણીતા જેનિસ હવે મનોરંજન ક્ષેત્રે વધુ એક મોટી સિદ્ધિ હાંસલ કરવા જઈ રહ્યા છે. પ્રતિષ્ઠિત T-Series Regionalના પ્લેટફોર્મ પર તેઓ ભગવાન શ્રીકૃષ્ણની મુખ્ય ભૂમિકામાં જોવા મળશે.
આગામી 31 ઓગસ્ટ, 2026ના રોજ ‘ઓ દ્વારિકાવાળા’ ગીત T-Series Regionalના ઓફિશિયલ પ્લેટફોર્મ પર રિલીઝ થવાનું છે. ભગવાન શ્રીકૃષ્ણને સમર્પિત આ ગીતનું દિગ્દર્શન રાજવિંદરસિંગે કર્યું છે, જ્યારે નિર્માણ જલ્પા દક્ષિણીએ કર્યું છે. ગીતનું સમગ્ર શૂટિંગ ભગવાન શ્રીકૃષ્ણની પાવન નગરી દ્વારિકામાં કરવામાં આવ્યું છે.
આ ગીતમાં રાજકોટના યુવા કલાકાર જેનિસ બુધ્ધદેવ ભગવાન શ્રીકૃષ્ણની મુખ્ય ભૂમિકામાં જોવા મળશે. રાજકોટના કલાકારને આટલા મોટા પ્લેટફોર્મ પર મહત્વની ભૂમિકા મળતા શહેરના કલા જગતમાં પણ આનંદની લાગણી જોવા મળી રહી છે.
ગીતના પ્રમોશન માટે 29 ઓગસ્ટે પોસ્ટર રિલીઝ, 30 ઓગસ્ટે ટીઝર અને 31 ઓગસ્ટે ગીતનું ઓફિશિયલ લોન્ચિંગ કરવામાં આવશે. આ સાથે જેનિસની T-Series Regional સાથેની નવી સફરની શરૂઆત થશે.
અનેક જાણીતી સિરિયલ અને ફિલ્મોમાં અભિનય
જેનિસ બુધ્ધદેવને બાળપણથી જ અભિનય પ્રત્યે વિશેષ રસ રહ્યો છે. પોતાની પ્રતિભા, મહેનત અને સતત પ્રયત્નોના કારણે તેમણે અત્યાર સુધીમાં અનેક જાણીતી હિન્દી સિરિયલોમાં કામ કર્યું છે.
જેનિસે ‘અહિલ્યાબાઈ’, ‘મેરે સાઈ’, ‘વિઘ્નહર્તા ગણેશ’, ‘રાધાકૃષ્ણ’ અને ‘ડૉ. બી. આર. આંબેડકર’ જેવી સિરિયલોમાં અભિનય કર્યો છે. આ ઉપરાંત 2 ડિસેમ્બર, 2022ના રોજ રિલીઝ થયેલી ‘ધમણ’ ફિલ્મમાં પણ મહત્વની ભૂમિકા ભજવી હતી.
મુંબઈમાં સંઘર્ષ બાદ સફળતાની નવી સફર
અભિનયને કારકિર્દી બનાવવાનું સપનું લઈને જેનિસે મુંબઈમાં પણ લાંબો સંઘર્ષ કર્યો છે. નાની ઉંમરથી જ ઓડિશન, શૂટિંગ અને અભિનય ક્ષેત્રે સતત મહેનત કરીને તેમણે પોતાની ઓળખ બનાવી છે. આજે T-Series જેવા પ્રતિષ્ઠિત પ્લેટફોર્મ પર શ્રીકૃષ્ણની ભૂમિકા ભજવવાની તક મળવી તેમની મહેનતનું પરિણામ માનવામાં આવી રહ્યું છે.
જેનિસની આ સિદ્ધિ માત્ર તેમના પરિવાર અને ચાહકો માટે જ નહીં, પરંતુ રાજકોટના કલા જગત માટે પણ ગૌરવની ક્ષણ બની છે. નાની ઉંમરે મળેલી આ સફળતા યુવા કલાકારો માટે પ્રેરણારૂપ બની રહી છે. તેમની સફર એ વાતનો સંદેશ આપે છે કે પ્રતિભા સાથે સતત મહેનત, સંઘર્ષ અને પોતાના લક્ષ્ય પ્રત્યેની નિષ્ઠા હોય તો મનોરંજન ક્ષેત્રે મોટી સફળતા મેળવી શકાય છે.
