જૂના પ્લોટ તબદીલી વ્યવહારોની બાકી સ્ટેમ્પ ડ્યુટી અને પેનલ્ટીમાંથી મળશે રાહત, હજારો ઉદ્યોગકારોને ફાયદો
વઢવાણ: રાજ્યના MSME ઉદ્યોગકારોને મોટી આર્થિક રાહત આપતા મુખ્યમંત્રી ભૂપેન્દ્ર પટેલે GIDC એમ્નેસ્ટી સ્કીમ અમલમાં મૂકવાની મહત્વપૂર્ણ જાહેરાત કરી છે. GIDCના ઔદ્યોગિક પ્લોટના અગાઉના તબદીલી વ્યવહારોમાં બાકી રહેલી સ્ટેમ્પ ડ્યુટી અને તેના પર લાગેલા પેનલ્ટીના ભારણમાંથી વર્તમાન માલિકોને રાહત આપવાનો નિર્ણય લેવામાં આવ્યો છે.
સરકારના ‘ઈઝ ઓફ ડુઈંગ બિઝનેસ’ અભિગમને વધુ વેગ આપતા આ નિર્ણયથી સુરેન્દ્રનગર-ઝાલાવાડ સહિત સમગ્ર ગુજરાતના હજારો ઉદ્યોગકારોને નાણાકીય રાહત મળવાની શક્યતા છે.
વર્ષો જૂના વ્યવહારોના ભારણમાંથી મુક્તિ
ઝાલાવાડ ફેડરેશન ઓફ ટ્રેડ એન્ડ ઈન્ડસ્ટ્રીઝના પ્રમુખ નરેશ ધનરાજ કેલાના જણાવ્યા મુજબ, છેલ્લા અનેક દાયકાઓ દરમિયાન GIDCના ઔદ્યોગિક પ્લોટની તબદીલીના કેટલાક વ્યવહારોમાં સ્ટેમ્પ ડ્યુટી બાકી રહી હતી.
આ બાકી સ્ટેમ્પ ડ્યુટી અંગે વર્તમાન માલિકોને ભારે પેનલ્ટી સાથે નોટિસ મળતા ઉદ્યોગકારો મુશ્કેલીમાં મુકાયા હતા. ભૂતકાળના વ્યવહારોની જવાબદારી વર્તમાન માલિકો પર આવવાથી ઉદ્યોગ જગતમાં લાંબા સમયથી આ મુદ્દે વન-ટાઈમ સેટલમેન્ટની માંગ કરવામાં આવી રહી હતી.
7 જુલાઈએ રજૂઆત, સરકારનો સકારાત્મક નિર્ણય
આ મુદ્દે 7 જુલાઈ 2026ના રોજ નાયબ મુખ્યમંત્રી હર્ષ સંઘવીને લેખિત રજૂઆત કરીને વન-ટાઈમ સેટલમેન્ટ સ્કીમ અમલમાં મૂકવાની માંગ કરવામાં આવી હતી.
સરકારે આ રજૂઆતને ધ્યાને લઈ હવે GIDC એમ્નેસ્ટી સ્કીમ અમલમાં મૂકવાની જાહેરાત કરતાં ઝાલાવાડના ઉદ્યોગકારોમાં રાહતની લાગણી જોવા મળી રહી છે.
ઉદ્યોગોના વિસ્તરણને મળશે વેગ
આ સ્કીમથી જૂના વ્યવહારોને નિયમિત કરવાની તક મળતાં વર્તમાન માલિકો પરનું આર્થિક ભારણ ઘટશે. મિલકતોની કાયદેસર નોંધણી અને દસ્તાવેજીકરણ વધુ સરળ બનશે, જેના કારણે ભવિષ્યના વ્યવહારો પણ વધુ પારદર્શક અને નિયમિત બની શકશે.
ઉદ્યોગ જગતના મતે, વર્ષોથી અટવાયેલા કેસોનો ઉકેલ આવતા નવા ઉદ્યોગોની સ્થાપના તેમજ હાલના ઔદ્યોગિક એકમોના વિસ્તરણ માટે વધુ સાનુકૂળ વાતાવરણ ઊભું થશે.
ઝાલાવાડ ફેડરેશન ઓફ ટ્રેડ એન્ડ ઈન્ડસ્ટ્રીઝના પ્રમુખ નરેશ ધનરાજ કેલાએ આ નિર્ણય બદલ મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીનો આભાર વ્યક્ત કર્યો છે.
