શીતળા સાતમથી જન્માષ્ટમી સુધી ચાર દિવસ મોજ-મસ્તીનો માહોલ; રેસકોર્સ લોકમેળામાં લાખોની ભીડ
પવિત્ર શ્રાવણ માસના તહેવારોની શ્રૃંખલા વચ્ચે સમગ્ર સૌરાષ્ટ્રમાં ભક્તિ અને ઉત્સાહનો માહોલ છવાયો છે. બોળચોથથી શરૂ થયેલા તહેવારોની ઉજવણી અંતર્ગત આજે શીતળા સાતમની શ્રદ્ધાભેર ઉજવણી થઈ રહી છે. આવતીકાલે જન્માષ્ટમીના પર્વની ધામધૂમથી ઉજવણી કરવામાં આવશે.
જન્માષ્ટમીની મધરાતે **‘નંદ ઘેર આનંદ ભયો, જય કનૈયા લાલ કી’**ના નાદ સાથે રાજકોટ સહિત સમગ્ર દેશ કૃષ્ણમય બનશે. રાજકોટના ઐતિહાસિક રેસકોર્સ ગ્રાઉન્ડ ખાતે લોકમેળાનો પ્રારંભ થઈ ગયો છે અને પ્રથમ દિવસથી જ મોટી સંખ્યામાં લોકો મેળાની મોજ માણવા ઉમટી પડ્યા હતા.
શીતળા સાતમના દિવસે પણ રેસકોર્સ મેદાનમાં ચકડોળ, ખાણી-પીણી અને રમકડાંના સ્ટોલ પર ભારે ભીડ જોવા મળી રહી છે. આગામી દિવસોમાં તહેવારોની રજાઓને કારણે મેળામાં વધુ માનવમહેરામણ ઉમટવાની શક્યતા છે.
જન્માષ્ટમીને લઈને રાજકોટ શહેરના ઇન્દિરા સર્કલ, નાણાવટી ચોક, જંકશન રોડ અને કિસાનપરા ચોક સહિતના વિસ્તારોને રોશની અને બેનરોથી શણગારવામાં આવ્યા છે. શહેરમાં વિવિધ સ્થળોએ જન્માષ્ટમીના કાર્યક્રમોનું પણ આયોજન કરવામાં આવ્યું છે.
તહેવારોની રજાઓ દરમિયાન લોકો પરિવાર સાથે ફરવા નીકળશે. જેને પગલે આજી ડેમ, લાલપરી તળાવ, પ્રદ્યુમ્ન પાર્ક ઝૂ અને ઇસ્કોન મંદિર સહિતના ધાર્મિક તથા પ્રવાસન સ્થળોએ મોટી સંખ્યામાં લોકો ઉમટી પડવાની સંભાવના છે. ભીડને ધ્યાનમાં રાખીને વહીવટી તંત્ર દ્વારા સુરક્ષા અને ટ્રાફિક વ્યવસ્થાને લઈને પણ આયોજન કરવામાં આવ્યું છે.
