ગુજરાતમાં ફરી એકવાર બોમ્બની ધમકીભર્યા ઈ-મેઈલથી સુરક્ષા તંત્ર દોડતું થયું છે. ઈ-મેઈલમાં સોમનાથ મંદિર, ગાંધીનગરનું ભાજપ પ્રદેશ કાર્યાલય ‘કમલમ’, અમદાવાદના ખાનપુર સ્થિત ભાજપ કાર્યાલય ઉપરાંત મુખ્યમંત્રી ભૂપેન્દ્ર પટેલ, પોલીસ અને RAWનો પણ ઉલ્લેખ કરવામાં આવ્યો છે.
ધમકી મળ્યા બાદ પોલીસ, બોમ્બ ડિટેક્શન એન્ડ ડિસ્પોઝલ સ્ક્વોડ, ડોગ સ્ક્વોડ અને ફાયર બ્રિગેડની ટીમોએ વિવિધ સ્થળોએ સઘન તપાસ હાથ ધરી હતી. અત્યાર સુધીની તપાસમાં કોઈ શંકાસ્પદ વસ્તુ મળી આવી નથી. ઈ-મેઈલની પ્રામાણિકતા અને મોકલનારની ઓળખ અંગે તપાસ ચાલી રહી છે.
ઈ-મેઈલમાં પાકિસ્તાન અને ખાલિસ્તાન સંબંધિત ઉશ્કેરણીજનક નારા હોવાના અહેવાલો છે. ગુજરાતમાં અગાઉ પણ કોર્ટ, શાળા અને અન્ય મહત્વના સ્થળોને આવા ઈ-મેઈલથી ધમકીઓ મળી ચૂકી છે. તાજેતરની ઘટનાઓ વચ્ચે પોલીસ આ ધમકીના સ્ત્રોત અને અગાઉના કેસો સાથેની સંભવિત કડીની પણ તપાસ કરી રહી છે.
