ગુજરાતમાં ESIC યોજનાના વિસ્તરણ સાથે રાજકોટમાં નવી સબ-રીજનલ ઓફિસ (SRO) શરૂ કરવાની મંજૂરી આપવામાં આવી છે. આ કચેરી શરૂ થયા બાદ સૌરાષ્ટ્રના 12 જિલ્લાઓના વહીવટી કામકાજ, યોગદાન અને ક્લેઈમ સંબંધિત કામગીરી માટે સ્થાનિક સ્તરે સુવિધા ઉપલબ્ધ થશે.
કેન્દ્ર સરકારના શ્રમ અને રોજગાર મંત્રાલયના 25 સપ્ટેમ્બર, 2026ના જાહેરનામા મુજબ 1 ઓક્ટોબરથી ગુજરાતના 31 જિલ્લાઓમાં ESIC યોજનાનો સંપૂર્ણ અમલ કરવામાં આવશે. સરકારના જણાવ્યા મુજબ આ વિસ્તરણથી રાજ્યના અંદાજે 8થી 10 લાખ નવા શ્રમિકો અને તેમના પરિવારો ESICના સામાજિક સુરક્ષા કવચ હેઠળ આવશે.
હાલ ગુજરાતમાં આશરે 21.68 લાખ કામદારો અને પરિવારજનો સહિત 84 લાખ લાભાર્થીઓ ESIC હેઠળ છે. યોજનાના સંપૂર્ણ અમલ બાદ નોંધાયેલા શ્રમિકોની સંખ્યા આશરે 32 લાખ અને કુલ લાભાર્થીઓની સંખ્યા 1.20 કરોડ સુધી પહોંચવાની શક્યતા છે.
રાજકોટ સહિત સૌરાષ્ટ્રના શ્રમિકોને મોટો લાભ
રાજકોટમાં SRO શરૂ થતાં સૌરાષ્ટ્રના 12 જિલ્લાઓના ESIC સંબંધિત વહીવટી કામો અને ક્લેઈમની કામગીરી સ્થાનિક સ્તરે થઈ શકશે. જેના કારણે શ્રમિકોને અન્ય શહેરોમાં ધક્કા ખાવાની જરૂરિયાત ઘટશે અને ક્લેઈમ તથા અન્ય વહીવટી પ્રક્રિયા ઝડપી બનવાની શક્યતા છે.
ESICના વિસ્તરણ સાથે આરોગ્ય સેવાઓનું માળખું પણ વધારવામાં આવી રહ્યું છે. રાજ્યમાં હાલમાં 103 ESIS ડિસ્પેન્સરી અને 11 ESIC/ESIS હોસ્પિટલો કાર્યરત છે. ઉપરાંત 234 CHC અને PHCને પણ એમ્પેનલ કરવામાં આવ્યા છે.
સાણંદમાં 350 બેડ અને કલોલ-ગાંધીનગરમાં 150 બેડની ESIC હોસ્પિટલનું કામ ચાલી રહ્યું છે. હાલોલ અને સાવલીમાં 100-100 બેડની હોસ્પિટલ માટે જમીન ફાળવણીની પ્રક્રિયા ચાલી રહી છે. મહેસાણા, ગાંધીધામ અને મોરબીમાં પણ નવી ESIC હોસ્પિટલો શરૂ કરવા કેન્દ્ર સરકારને ભલામણ મોકલાશે.
રાજ્યમાં છેલ્લા બે મહિનામાં 13 સરકારી અને 55 ખાનગી મળી 68 હોસ્પિટલોને ESIC પેનલમાં સામેલ કરવામાં આવી છે. આ ઉપરાંત મોટી સંખ્યામાં સરકારી અને ખાનગી હોસ્પિટલો મારફતે પાત્ર શ્રમિકોને કેશલેસ સારવારની સુવિધા મળશે.
ESICના વિસ્તરણથી રાજકોટ સહિત સમગ્ર સૌરાષ્ટ્રના લાખો શ્રમિકો માટે વહીવટી કામગીરી અને આરોગ્ય સેવાઓ વધુ સ્થાનિક અને સુલભ બનશે.
