હાર્ટ ઇમરજન્સીના 10માંથી 3 દર્દી 40 વર્ષ કે તેથી ઓછી ઉંમરના, તમાકુ અને તણાવ સહિતના પરિબળો જવાબદાર
ગુજરાતમાં હૃદયરોગ હવે માત્ર મોટી ઉંમરના લોકો પૂરતો સીમિત રહ્યો નથી. 2026માં અત્યાર સુધી 108 એમ્બ્યુલન્સ સેવા દ્વારા 71,088 હાર્ટ ઇમરજન્સીના દર્દીઓને હોસ્પિટલ પહોંચાડવામાં આવ્યા છે, જેમાં આશરે 30 ટકા દર્દીઓ 40 વર્ષ કે તેથી ઓછી ઉંમરના હોવાનું સામે આવ્યું છે.
યુવાનોમાં હાર્ટ એટેકના કારણો અંગે યુ.એન. મહેતા હાર્ટ હોસ્પિટલના અભ્યાસમાં તમાકુનું સેવન, શારીરિક નિષ્ક્રિયતા, બહારનું ખાવું અને માનસિક તણાવ જેવા પરિબળો સામે આવ્યા છે. 30 વર્ષ સુધીના દર્દીઓમાં 53% તમાકુનું સેવન, 51%માં શારીરિક સક્રિયતાનો અભાવ અને 28%માં તણાવ નોંધાયો હતો.
તબીબોના મતે સ્થૂળતા, ડાયાબિટીસ, હાઈ બ્લડ પ્રેશર, પરિવારનો હૃદયરોગનો ઈતિહાસ અને અસ્વસ્થ જીવનશૈલી યુવાનોમાં જોખમ વધારી શકે છે. તબીબોએ ધૂમ્રપાનથી દૂર રહેવા, નિયમિત કસરત, પૌષ્ટિક આહાર અને સમયસર હેલ્થ ચેકઅપ પર ભાર મૂક્યો છે.
