ગાંધીનગરમાં ફરી લહેરાયું કેસરીયું વાવાઝોડું, ભાજપે 5 વોર્ડની તમામ 20 બેઠકો જીતીને નોંધાવ્યો ભવ્ય વિજય
રાજ્યના પાટનગર ગાંધીનગરની મહાનગરપાલિકામાં ફરી એકવાર ભાજપનું શાસન યથાવત રહેવાના સંકેત મળી રહ્યા છે. મહાનગરપાલિકાની કુલ 44 બેઠકો માટે રવિવારે 59 ટકા મતદાન થયા બાદ સેક્ટર-15 કોલેજ ખાતે આજે સવારે 9 વાગ્યાથી મતગણતરી શરૂ થઈ હતી. પ્રારંભિક પરિણામોથી જ ભાજપે સરસાઈ મેળવીને વિજય તરફ મજબૂત આગેકૂચ કરી હતી.
મતગણતરી દરમિયાન ભાજપે વોર્ડ નં. 3, 5, 7 અને 9માં પેનલ-ટુ-પેનલ જીત મેળવી હતી. ત્યારબાદ પાંચ વોર્ડની તમામ 20 બેઠકો પર ભાજપે વિજય મેળવીને ક્લીન સ્વીપ નોંધાવ્યો હતો. બીજી તરફ, કોંગ્રેસને માત્ર એક બેઠક પર સરસાઈ મળી હતી, જ્યારે આમ આદમી પાર્ટી પ્રારંભિક પરિણામોમાં ખાસ પ્રભાવ પાડી શકી નહોતી. પરિણામોને પગલે વિપક્ષની છાવણીમાં નિરાશાનો માહોલ જોવા મળ્યો હતો.
ખાસ વાત એ છે કે વોર્ડ નં. 5 મેયરનો વોર્ડ હોવાથી અહીં ઓછા મતદાનને કારણે ભાજપની ચિંતા વધી હતી, પરંતુ પરિણામોમાં ભાજપે તમામ બેઠકો જીતીને પોતાનું વર્ચસ્વ સાબિત કર્યું હતું. અગાઉ વર્ષ 2021ની ચૂંટણીમાં ભાજપે 44માંથી 41 બેઠકો જીતીને મહાનગરપાલિકામાં સત્તા મેળવી હતી. આ વખતે પણ ભાજપે મજબૂત પ્રદર્શન કરીને ગાંધીનગરમાં પોતાનું રાજકીય પ્રભુત્વ જાળવી રાખવાના સંકેત આપ્યા છે.
રાજ્યમાં અગાઉ યોજાયેલી મહાનગરપાલિકાઓની ચૂંટણીઓમાં પણ ભાજપે સારો દેખાવ કર્યો હતો. હવે ગાંધીનગર મનપાની ચૂંટણીનાં પરિણામો સાથે રાજ્યના સ્થાનિક સ્વરાજ્યના રાજકારણમાં ભાજપની સ્થિતિ વધુ મજબૂત બનતી દેખાઈ રહી છે. પાંચ વોર્ડમાં ક્લીન સ્વીપ સાથે ભાજપે વિપક્ષને મોટો ફટકો આપ્યો છે. બાકીની બેઠકોનાં પરિણામો બાદ ગાંધીનગર મહાનગરપાલિકામાં સત્તાનું ચિત્ર વધુ સ્પષ્ટ બનશે.
