ગુજરાતી ભક્તિ સંગીત, જૈન સ્તવનો અને સુગમ સંગીતમાં આપ્યું હતું અમૂલ્ય યોગદાન; લોકપ્રિય શ્રી શંખેશ્વર આરતીના ગાયકના અવસાનથી સંગીતપ્રેમીઓમાં શોકની લાગણી
ગુજરાતના જાણીતા ગાયક અને સંગીત નિર્દેશક લલિત જમનાદાસ સોઢાનું મુંબઈ ખાતે આજે વહેલી સવારે નિધન થયું છે. ગુજરાતી સુગમ સંગીત, ભક્તિગીતો, જૈન સ્તવનો અને પરંપરાગત ભજનોના ક્ષેત્રમાં તેમણે વિશેષ પ્રદાન કર્યું હતું. પોતાના મધુર કંઠ અને સંગીતની આગવી શૈલીથી તેમણે અનેક શ્રોતાઓના હૃદયમાં સ્થાન મેળવ્યું હતું.
લલિત સોઢાએ ગુજરાતી સંગીત જગતને અનેક લોકપ્રિય આલ્બમો અને યાદગાર રચનાઓની ભેટ આપી હતી. તેમના સ્વરમાં ગવાયેલી શ્રી શંખેશ્વર આરતી ખાસ્સી લોકપ્રિય બની હતી અને આજે પણ અનેક શ્રદ્ધાળુઓમાં જાણીતી છે. તેમણે આશિત દેસાઈ અને હેમા દેસાઈ સહિતના જાણીતા કલાકારો સાથે પણ અનેક રચનાઓમાં સ્વર આપ્યો હતો. ભક્તિ સંગીત અને જૈન ધાર્મિક રચનાઓને લોકપ્રિય બનાવવામાં તેમનું યોગદાન નોંધપાત્ર રહ્યું હતું.
તેમના નિધનના સમાચારથી ગુજરાતી સંગીત જગતમાં શોકની લાગણી ફેલાઈ ગઈ છે. સંગીતપ્રેમીઓ અને ચાહકો તેમના સંગીતમય યોગદાનને યાદ કરી રહ્યા છે. અભિનેતા અને નાટ્યકાર બાબુલ ભાવસારે પણ લલિત સોઢાને શ્રદ્ધાસુમન અર્પણ કરીને દુઃખ વ્યક્ત કર્યું હતું.
આજે બપોરે મુંબઈના કાંદિવલી ખાતે આવેલા તેમના નિવાસસ્થાનેથી અંતિમયાત્રા નીકળી હતી. આ અંતિમયાત્રામાં સંગીત જગત સાથે સંકળાયેલા લોકો તેમજ જૈન સમાજના અગ્રણીઓ જોડાયા હતા અને દિવંગત ગાયકને અંતિમ વિદાય આપી હતી. લલિત સોઢાએ પોતાના સ્વર અને સંગીત દ્વારા સર્જેલી યાદગાર રચનાઓના કારણે તેઓ સંગીતપ્રેમીઓના હૃદયમાં હંમેશાં જીવંત રહેશે.
