9 ઓક્ટોબરથી અભયારણ્યમાં પ્રવેશ શરૂ, રૂ. 26 કરોડના ખર્ચે વિકાસકાર્યો; યાયાવર પક્ષીઓના નિહાળવા માટે શિયાળાની ઋતુ શ્રેષ્ઠ
ગુજરાતના પ્રકૃતિપ્રેમીઓ અને પ્રવાસીઓ માટે ખુશખબર સામે આવી છે. વિશ્વપ્રસિદ્ધ નળસરોવર પક્ષી અભયારણ્યને 9 ઓક્ટોબરથી સત્તાવાર રીતે પ્રવાસીઓ માટે ખુલ્લું મુકવામાં આવ્યું છે. ચોમાસા દરમિયાન પક્ષીઓના સંરક્ષણ અને પ્રવાસીઓની સુરક્ષાને ધ્યાનમાં રાખીને જૂન મહિનાથી બંધ રાખવામાં આવેલા અભયારણ્યમાં હવે પ્રવાસીઓ ફરી પ્રકૃતિનો આનંદ માણી શકશે.
નળસરોવર દેશ-વિદેશથી આવતા દુર્લભ અને યાયાવર પક્ષીઓ માટે જાણીતું છે. ખાસ કરીને નવેમ્બરથી ફેબ્રુઆરી દરમિયાન અહીં મોટી સંખ્યામાં પક્ષીઓ જોવા મળતા હોવાથી પક્ષીપ્રેમીઓ, ફોટોગ્રાફરો અને પ્રકૃતિપ્રેમીઓ માટે આ સ્થળ વિશેષ આકર્ષણનું કેન્દ્ર બને છે.
પ્રવાસીઓને વધુ સારી સુવિધાઓ મળી રહે તે માટે ગુજરાત પ્રવાસન વિભાગ દ્વારા અંદાજે રૂ. 26 કરોડના ખર્ચે વિકાસકાર્યો કરવામાં આવ્યાં છે. જોકે, નળસરોવરમાં બોટિંગનો આનંદ માણવા ઇચ્છતા પ્રવાસીઓએ હજુ થોડી રાહ જોવી પડશે. બોટિંગ સેવા શરૂ કરવાની તૈયારીઓ ચાલી રહી છે અને પ્રવાસીઓની સુરક્ષાને પ્રાથમિકતા આપવામાં આવી રહી છે.
નળસરોવર સવારે 6થી સાંજે 5:30 વાગ્યા સુધી પ્રવાસીઓ માટે ખુલ્લું રહેશે. મુલાકાત લેતા પ્રવાસીઓએ પ્રવેશ માટે અગાઉથી ઓનલાઇન પરમિટની વ્યવસ્થા અને બોટિંગ સેવા અંગેની તાજી માહિતી સત્તાવાર પોર્ટલ પર ચકાસી લેવી જરૂરી છે.
