કાળઝાળ ગરમી વચ્ચે લીંબુ મોંઘાં થતાં સામાન્ય જનતાને ફટકો, ભાવ સાંભળીને ગ્રાહકો ખરીદી કર્યા વિના પરત ફરવા મજબૂર
વધતી મોંઘવારી વચ્ચે હવે લીંબુના આસમાને પહોંચેલા ભાવે સામાન્ય નાગરિકોની મુશ્કેલીમાં વધારો કર્યો છે. અનાજ, કઠોળ અને શાકભાજીના ભાવવધારા બાદ હવે રસોડામાં ઉપયોગી લીંબુના છૂટક ભાવ રૂ. 200થી રૂ. 300 પ્રતિ કિલો સુધી પહોંચી ગયા છે. ગરમીમાં રાહત મેળવવા માટે લીંબુ પાણીનો સહારો લેતા લોકોને પણ હવે મોંઘવારીનો માર સહન કરવો પડી રહ્યો છે.
અસહ્ય ગરમી વચ્ચે લીંબુની માંગ વધી
આસો મહિનામાં સામાન્ય રીતે વાતાવરણમાં ઠંડકનો અહેસાસ થવા લાગે છે, પરંતુ આ વર્ષે નવરાત્રિ દરમિયાન પણ ગરમીનો પ્રકોપ યથાવત રહેતાં લોકો પરેશાન છે. ગરમીથી રાહત મેળવવા માટે નાગરિકો લીંબુ શરબત અને લીંબુ પાણીનો ઉપયોગ કરી રહ્યા છે. બીજી તરફ, નવરાત્રિના ઉપવાસ દરમિયાન પણ લીંબુની જરૂરિયાત રહેતી હોવાથી તેની માંગ વધી રહી છે. જોકે, ઊંચા ભાવને કારણે લોકોને પોતાના બજેટમાં કાપ મૂકવાની ફરજ પડી રહી છે.
ભાવ સાંભળીને જ ગ્રાહકો ખરીદી ટાળી રહ્યા છે
શાકભાજી બજારોમાં લીંબુના ઊંચા ભાવની અસર ખરીદી પર જોવા મળી રહી છે. ખાસ કરીને ગરીબ અને મધ્યમ વર્ગના પરિવારો માટે રૂ. 300 પ્રતિ કિલોના ભાવે લીંબુ ખરીદવું મુશ્કેલ બન્યું છે. લારી પર ભાવ પૂછ્યા બાદ અનેક ગ્રાહકો ખરીદી કર્યા વિના પરત ફરી રહ્યા હોવાનું વેપારીઓ જણાવી રહ્યા છે. ગ્રાહકોની ખરીદી ઘટતાં વેપારીઓને પણ ઓછો જથ્થો મંગાવવાની ફરજ પડી રહી છે. આમ, ગરમીમાં રાહત આપતું લીંબુ હવે મોંઘવારીના કારણે સામાન્ય લોકોના બજેટ પર ભાર બની રહ્યું છે.
