કારોલી નજીકની ફેક્ટરીમાં ફોમ સીટોના કારણે આગે વિકરાળ સ્વરૂપ ધારણ કર્યું; મેજર કોલ જાહેર, પ્રાથમિક અહેવાલ મુજબ જાનહાનિ ટળી
ગાંધીનગર અને અમદાવાદની સરહદ નજીક સાંતેજના કારોલી વિસ્તારમાં આવેલી સિંઘલ ઇન્ડસ્ટ્રીઝમાં અચાનક ભીષણ આગ ફાટી નીકળતાં ભારે અફરાતફરી મચી ગઈ હતી. ફેક્ટરીમાં ફોમ સીટો હોવાને કારણે આગે ઝડપથી વિકરાળ સ્વરૂપ ધારણ કર્યું હતું. આગના પગલે આકાશમાં ધુમાડાના કાળા ગોટેગોટા દૂર સુધી દેખાયા હતા. ઘટનાની જાણ થતાં જ ફાયર વિભાગની ટીમો ઘટનાસ્થળે દોડી ગઈ હતી.
મેજર કોલ જાહેર, અનેક ફાયર ફાઇટરો કામે લાગ્યા
આગની ગંભીરતાને ધ્યાનમાં રાખીને ફાયર વિભાગે મેજર કોલ જાહેર કર્યો હતો. કલોલ ફાયર બ્રિગેડની ત્રણ ગાડીઓ, મહેસાણા જિલ્લાના કડીથી બે ગાડીઓ અને ગાંધીનગરથી બે ગજરાજ ગાડીઓ સહિતના ફાયર સાધનો આગને કાબૂમાં લેવા માટે કામે લગાવવામાં આવ્યા હતા. આ ઉપરાંત માણસા, અમદાવાદ અને વડસરથી પણ વધુ ફાયર ટીમોને બોલાવવામાં આવી હતી.
શ્રમિકો સુરક્ષિત બહાર નીકળ્યા હોવાની પ્રાથમિક માહિતી
આગ લાગવાના સમયે ફેક્ટરીમાં શ્રમિકો અને કર્મચારીઓ હાજર હતા. જોકે, પ્રાથમિક માહિતી મુજબ તમામ શ્રમિકો સમયસર ફેક્ટરીની બહાર નીકળી જતાં હાલ કોઈ જાનહાનિ થયાના અહેવાલ નથી. બનાવની જાણ થતાં મામલતદાર સહિતના વહીવટી અધિકારીઓ પણ ઘટનાસ્થળે પહોંચ્યા હતા.
આગનું કારણ અને નુકસાન અંગે તપાસ
ફેક્ટરીમાં લાગેલી આગને કાબૂમાં લેવા ફાયર વિભાગની ટીમો દ્વારા પ્રયાસો હાથ ધરવામાં આવ્યા હતા. આગ સંપૂર્ણપણે બુઝાયા બાદ જ નુકસાનનો અંદાજ અને આગ લાગવાનું ચોક્કસ કારણ જાણી શકાશે. હાલ ઘટનાને પગલે ઔદ્યોગિક વિસ્તારમાં ચિંતા અને અફરાતફરીનો માહોલ સર્જાયો છે.
