ગુડલક એસ્ટેટના A.N. ગૃહ ઉદ્યોગમાં ફૂડ વિભાગના દરોડા; એક જ તેલમાં વારંવાર ફરસાણ તળાતું હોવાની તપાસમાં ખુલાસો, 1,010 કિલો જથ્થો સ્થગિત કરાયો
દિવાળીના તહેવારો પહેલાં અમદાવાદમાં ખાદ્ય પદાર્થોમાં ભેળસેળ સામે મ્યુનિસિપલ કોર્પોરેશનના ફૂડ વિભાગે કાર્યવાહી તેજ કરી છે. દાણીલીમડામાં નકલી ટામેટાં સોસનો જથ્થો ઝડપાયા બાદ હવે ગુડલક એસ્ટેટમાં આવેલા A.N. ગૃહ ઉદ્યોગમાં દરોડા પાડવામાં આવ્યા હતા. તપાસ દરમિયાન ફરસાણ બનાવવામાં હાનિકારક કેમિકલ ડાઈનો ઉપયોગ, ગંદકી અને એક જ તેલનો વારંવાર ઉપયોગ થતો હોવાનું સામે આવ્યું હતું. નિયમોના ભંગ બદલ એકમને સીલ કરવામાં આવ્યો હતો.
ફરસાણમાં પ્રતિબંધિત કલરનો ઉપયોગ
ફૂડ વિભાગની તપાસ દરમિયાન ગૃહ ઉદ્યોગમાં મસાલા સિંગ, ઝીણી સેવ અને ફરસી પૂરી સહિતના ફરસાણનું ઉત્પાદન થતું હોવાનું જાણવા મળ્યું હતું. તપાસમાં ફરસાણમાં મંજૂરી ન હોય તેવા કલરનો ઉપયોગ થતો હોવાનું સામે આવ્યું હતું. આ ઉપરાંત ફરસાણ બનાવવાની જગ્યાએ સ્વચ્છતાનો અભાવ પણ જોવા મળ્યો હતો.
એક જ તેલ વારંવાર ગરમ કરી ફરસાણ તળાતું હતું
તપાસમાં એક જ તેલને વારંવાર ગરમ કરીને તેમાં ફરસાણ તળવામાં આવતું હોવાનું પણ સામે આવ્યું હતું. તેના કારણે તેલમાં ટોટલ પોલર કમ્પાઉન્ડ્સ (TPC)નું પ્રમાણ વધી ગયું હોવાનું જણાવાયું હતું. આ ઉપરાંત કામદારો હેરકવર અને એપ્રન વિના કામ કરતા હતા, જ્યારે તૈયાર ફરસાણનાં પેકેટ પર જરૂરી લેબલિંગ પણ યોગ્ય રીતે કરવામાં આવતું નહોતું.
1,010 કિલો ફરસાણનો જથ્થો સ્થગિત
ખાદ્ય સુરક્ષાના નિયમોના ભંગને ધ્યાનમાં રાખીને ફૂડ વિભાગે ગૃહ ઉદ્યોગને સીલ કર્યો હતો. સાથે જ મેંદો, મસાલા સિંગ, ઝીણી સેવ, ફરસી પૂરી સહિત કુલ 1,010 કિલો જથ્થો સ્થગિત કરવામાં આવ્યો હતો.
દિવાળીના તહેવારો દરમિયાન ફરસાણ અને અન્ય ખાદ્ય ચીજોની માંગ વધતી હોય છે. આવા સમયે ખાદ્ય પદાર્થોની ગુણવત્તા, સ્વચ્છતા અને તેમાં વપરાતા ઘટકોની ચકાસણી જરૂરી બને છે. ફૂડ વિભાગની આ કાર્યવાહીથી ખાદ્ય પદાર્થો બનાવતા એકમોમાં નિયમોનું પાલન કેટલું થાય છે તે મુદ્દો ફરી ચર્ચામાં આવ્યો છે.
