ગુજરાત સરકારે સરકારી કચેરીઓમાં સફાઈ અભિયાન હાથ ધરી 6 લાખ જેટલી બિનઉપયોગી વસ્તુઓનો કર્યો નિકાલ; આરોગ્ય વિભાગની 18 હોસ્પિટલોને મળી રાહત
અમદાવાદઃ દિવાળીના તહેવાર દરમિયાન લોકો ઘરની સફાઈ કરીને બિનઉપયોગી વસ્તુઓનો નિકાલ કરે છે, તેવી જ રીતે ગુજરાત સરકારે પણ રાજ્યભરની સરકારી કચેરીઓમાં સફાઈ અભિયાન હાથ ધરી મોટા પ્રમાણમાં ભંગારનો નિકાલ કર્યો છે. જૂનાં ફર્નિચર, કમ્પ્યુટર, તૂટેલાં સાધનો અને અન્ય બિનઉપયોગી વસ્તુઓ દૂર થતાં કચેરીઓમાં જગ્યા ખાલી થઈ છે.
આ અભિયાનથી આરોગ્ય વિભાગને ખાસ ફાયદો થયો છે. રાજ્યની 18 હોસ્પિટલો સહિત વિવિધ આરોગ્ય સંસ્થાઓમાં જૂના બેડ, તૂટેલાં તબીબી સાધનો, ગાદલાં, ઓશીકાં, ચાદરો, પાઇપલાઇન, વાયર અને લાઇટિંગની બિનઉપયોગી વસ્તુઓ દૂર કરવામાં આવી છે. અહેવાલ મુજબ, આરોગ્ય વિભાગે આશરે 6 લાખ જેટલી વસ્તુઓનો નિકાલ કર્યો છે, જેમાં પાંચ લાખ જેટલાં બિનઉપયોગી ગાદલાં અને ચાદરોનો સમાવેશ થાય છે.
સરકારી કચેરીઓમાં ફર્નિચર અને સાધનોનો હિસાબ ડેડ સ્ટોક રજિસ્ટરમાં રાખવામાં આવતો હોવાથી બિનઉપયોગી વસ્તુઓનો નિકાલ નિયમો અનુસાર કરવો જરૂરી હોય છે. બીજી તરફ, રાજ્યભરમાં અંદાજે 807 જૂની એમ્બ્યુલન્સનો નિકાલ કરવાનો બાકી છે. આ વાહનોને સ્ક્રેપમાં મોકલવા અંગેનો નિર્ણય ઉચ્ચ સ્તરે લેવામાં આવશે.
સરકારે 15 વર્ષ જૂનાં 5,486 વાહનોને પણ સ્ક્રેપમાં મોકલવાની પ્રક્રિયા હાથ ધરી હતી, જેમાં રાજકોટનાં 1,346 વાહનોનો સમાવેશ થતો હોવાનું અહેવાલમાં જણાવાયું છે. તેમ છતાં રાજ્યમાં હજી પણ અનેક જૂનાં સરકારી વાહનો નિકાલની રાહ જોઈ રહ્યાં છે.
આ ઉપરાંત, પોલીસ દ્વારા વિવિધ કેસોમાં જપ્ત કરવામાં આવેલાં વાહનોનો પણ મોટો જથ્થો પડ્યો છે. આ વાહનો કાનૂની પુરાવા તરીકે મહત્ત્વ ધરાવતા હોવાથી તેમનો નિકાલ કરવો મુશ્કેલ બની રહ્યો છે. આમ, સરકારી કચેરીઓમાં ભંગાર દૂર કરવાની કામગીરીથી જગ્યા ખાલી થઈ છે, પરંતુ જૂનાં વાહનો અને કાનૂની પુરાવા તરીકે જાળવવામાં આવેલા વાહનોના નિકાલનો પ્રશ્ન હજી યથાવત્ છે.
