47 હજાર ચોરસ મીટર વિસ્તારમાં વિકસાવાયું વિશાળ પ્રાકૃતિક પરિસર; 220 મીટર લાંબો ગ્લાસ ડેક સ્કાયવોક, ધોધ અને બાળકો માટે ખાસ આકર્ષણો
એકતાનગરઃ સ્ટેચ્યુ ઑફ યુનિટી નજીક પ્રવાસીઓ માટે વધુ એક નવું આકર્ષણ ઉમેરાવા જઈ રહ્યું છે. નર્મદા જિલ્લાના એકતાનગરમાં વાગડિયા ચેકપોસ્ટ પાસે નવા ગોરા બ્રિજની નજીક રૂ. 9.49 કરોડના ખર્ચે 47 હજાર ચોરસ મીટર વિસ્તારમાં રેઇન ફોરેસ્ટ વિકસાવવામાં આવ્યું છે. આ પ્રોજેક્ટનું લોકાર્પણ વડાપ્રધાન નરેન્દ્ર મોદી કરશે.
આ રેઇન ફોરેસ્ટમાં ભારતના પશ્ચિમ ઘાટ, હિમાલય અને આંદામાન-નિકોબાર ટાપુઓમાં જોવા મળતી વિવિધ સદાબહાર વનસ્પતિઓનું વાવેતર કરવામાં આવ્યું છે. અહીં પ્રવાસીઓને એક જ સ્થળે અલગ-અલગ પ્રદેશોની વનસ્પતિઓ અને જૈવવિવિધતા નિહાળવાની તક મળશે. સાથે જ વરસાદી જંગલોની પરિસ્થિતિકીય વ્યવસ્થા, વનસંરક્ષણ અને પર્યાવરણના મહત્ત્વ વિશે પણ જાણકારી મેળવી શકશે.
220 મીટર લાંબો ગ્લાસ ડેક સ્કાયવોક બનશે મુખ્ય આકર્ષણ
રેઇન ફોરેસ્ટનું સૌથી મોટું આકર્ષણ આશરે 220 મીટર લાંબો ગ્લાસ ડેક ધરાવતો સ્કાયવોક બ્રિજ રહેશે. તેના પર ચાલતાં પ્રવાસીઓને ઊંચાઈ પરથી આસપાસના પ્રાકૃતિક સૌંદર્યનો અનોખો અનુભવ થશે.
આ ઉપરાંત અહીં 5થી 8 મીટર ઊંચો ધોધ, સર્ક્યુલર તળાવ અને તેને જોડતા પુલો બનાવવામાં આવ્યા છે. પ્રાકૃતિક પથ્થરોથી તૈયાર કરાયેલું 20 ફૂટ ઊંચું અને 40 ફૂટ પહોળું પ્રવેશદ્વાર પણ પરિસરની સુંદરતામાં વધારો કરશે.
વૉકિંગ ટ્રેલ્સ અને થીમેટિક લેન્ડસ્કેપિંગ
રેઇન ફોરેસ્ટમાં નર્મદાના પથ્થરો તેમજ ઈંટ-ચૂનાથી વૉકિંગ ટ્રેલ્સ તૈયાર કરવામાં આવ્યા છે. વૃક્ષોની હારમાળા અને વિવિધ સ્તરોમાં કરાયેલા થીમેટિક લેન્ડસ્કેપિંગને કારણે પ્રવાસીઓને પ્રકૃતિની નજીક રહેવાનો અનુભવ મળશે.
આ સમગ્ર પરિસરને એવી રીતે વિકસાવવામાં આવ્યું છે કે મુલાકાતીઓ વિવિધ પ્રકારની વનસ્પતિઓને નજીકથી નિહાળી શકે અને વરસાદી જંગલોની વિશેષતાઓ સમજી શકે.
બાળકો માટે રોક ક્લાઇમ્બિંગથી લઈને ટ્રી બાલ્કની સુધીની સુવિધા
બાળકોને ધ્યાનમાં રાખીને અહીં વિશેષ પ્લે એરિયા તૈયાર કરવામાં આવ્યો છે. તેમાં રોક ક્લાઇમ્બિંગ વૉલ, વિવિધ ઊંચાઈની સ્લાઇડ્સ, સીડીથી જોડાયેલી ટ્રી બાલ્કની અને હીંચકાઓ જેવી સુવિધાઓ ઉપલબ્ધ કરાવવામાં આવશે.
પ્રવાસીઓને માર્ગદર્શન આપવા માટે ઇન્ફોર્મેશન સેન્ટર પણ બનાવવામાં આવ્યું છે. અહીં નકશા, ચિત્રો, માહિતીપ્રદ ડિસ્પ્લે અને QR કોડ દ્વારા વરસાદી જંગલોની ઇકોલોજી, જૈવવિવિધતા તથા વનસંરક્ષણ અંગે માહિતી મેળવી શકાશે.
ઇકો-ટુરિઝમ અને શૈક્ષણિક પ્રવૃત્તિઓને મળશે વેગ
આ રેઇન ફોરેસ્ટ એકતાનગરમાં ઇકો-ટુરિઝમને પ્રોત્સાહન આપશે. વિદ્યાર્થીઓ, સંશોધકો અને પ્રકૃતિપ્રેમીઓ માટે પણ આ સ્થળ પર્યાવરણ અને જૈવવિવિધતાના અભ્યાસનું કેન્દ્ર બની શકે છે.
પ્રકૃતિનો અનુભવ, પર્યાવરણ અંગેનું શિક્ષણ અને મનોરંજન—આ ત્રણેય બાબતોનો સમન્વય ધરાવતું આ નવું આકર્ષણ એકતાનગરની પ્રવાસન ઓળખને વધુ મજબૂત બનાવશે. પ્રવાસીઓની સંખ્યામાં વધારો થતાં સ્થાનિક વેપાર અને આર્થિક પ્રવૃત્તિઓને પણ પ્રોત્સાહન મળવાની અપેક્ષા છે.
