સરદાર પટેલની જન્મજયંતી નિમિત્તે નવલખી ગ્રાઉન્ડ ખાતે કાર્યક્રમ યોજાયો; મુખ્યમંત્રી પણ દોડમાં જોડાયા, યુવાનો અને નાગરિકોમાં ઉત્સાહ
વડોદરા: સરદાર વલ્લભભાઈ પટેલની જન્મજયંતી નિમિત્તે વડોદરાના નવલખી ગ્રાઉન્ડ ખાતે રાષ્ટ્રીય એકતા દિવસ-2026ની ઉજવણી કરવામાં આવી હતી. આ પ્રસંગે મુખ્યમંત્રી ભૂપેન્દ્ર પટેલની ઉપસ્થિતિમાં ‘રન ફોર યુનિટી’નું આયોજન કરાયું હતું. કાર્યક્રમમાં દેશભક્તિ અને રાષ્ટ્રીય એકતાનો માહોલ જોવા મળ્યો હતો. મોટી સંખ્યામાં નાગરિકો અને યુવાનો ઉત્સાહભેર જોડાયા હતા.
સવારે 7 વાગ્યે નવલખી ગ્રાઉન્ડ ખાતે પહોંચેલા મુખ્યમંત્રીનું પોલીસ બેન્ડની સુરાવલીઓ અને ગાર્ડ ઓફ ઓનર સાથે સ્વાગત કરવામાં આવ્યું હતું. ત્યારબાદ તેમણે સરદાર વલ્લભભાઈ પટેલની પ્રતિમાને પુષ્પાંજલિ અર્પણ કરી હતી. રાષ્ટ્રગાન બાદ વડોદરા પોલીસ કમિશનરે ઉપસ્થિત નાગરિકો અને વિદ્યાર્થીઓને રાષ્ટ્રીય એકતાના શપથ લેવડાવ્યા હતા.
મુખ્યમંત્રી ભૂપેન્દ્ર પટેલે ‘રન ફોર યુનિટી’ને લીલી ઝંડી આપી પ્રસ્થાન કરાવ્યું હતું. તેઓ પોતે પણ દોડમાં જોડાયા હતા અને ઉપસ્થિત નાગરિકો તથા યુવાનોનો ઉત્સાહ વધાર્યો હતો.
નશામુક્તિ અને સ્વસ્થ જીવનનો સંદેશ
કાર્યક્રમ દરમિયાન યુવાનોએ નશામુક્તિ અને સ્વસ્થ જીવન અંગે જાગૃતિ ફેલાવતા પ્લે કાર્ડ્સ પ્રદર્શિત કર્યા હતા. આ માધ્યમથી યુવાનોને નશાથી દૂર રહેવા અને સ્વસ્થ જીવનશૈલી અપનાવવાનો સંદેશ આપવામાં આવ્યો હતો.
રાષ્ટ્રીય એકતા દિવસ નિમિત્તે યોજાયેલા આ કાર્યક્રમ દ્વારા સરદાર પટેલના એકતા, અખંડિતતા અને રાષ્ટ્રભાવનાના વિચારોને યાદ કરવામાં આવ્યા હતા. ‘રન ફોર યુનિટી’માં નાગરિકો અને યુવાનોની ભાગીદારીથી રાષ્ટ્રીય એકતાનો સંદેશ વધુ મજબૂત બનાવવાનો પ્રયાસ કરવામાં આવ્યો હતો.
