ઓક્ટોબરમાં 403 વિમાનોની અવરજવર નોંધાઈ; સપ્ટેમ્બરની સરખામણીએ 6,481 મુસાફરોનો વધારો, દિવાળી વેકેશનમાં પ્રવાસીઓની સંખ્યા વધવાની શક્યતા
રાજકોટના હીરાસર સ્થિત ઇન્ટરનેશનલ એરપોર્ટ પર હવાઈ સેવાઓનો વ્યાપ વધવાની સાથે મુસાફરોની સંખ્યામાં પણ સતત વધારો થઈ રહ્યો છે. ઓક્ટોબર મહિનામાં પ્રથમવાર એક લાખથી વધુ મુસાફરોએ એરપોર્ટ પરથી હવાઈ સફર કરી હતી. આ મહિનામાં કુલ 1,03,615 મુસાફરોની અવરજવર નોંધાઈ હતી. જેમાં 54,421 મુસાફરોનું આગમન અને 49,194 મુસાફરોનું પ્રસ્થાન થયું હતું. આ સમયગાળા દરમિયાન એરપોર્ટ પર કુલ 403 વિમાનોની અવરજવર નોંધાઈ હતી.
સપ્ટેમ્બરની સરખામણીએ મુસાફરોની સંખ્યામાં વધારો
સપ્ટેમ્બર મહિનામાં હીરાસર એરપોર્ટ પરથી 361 વિમાનોની અવરજવર સાથે કુલ 97,314 મુસાફરોએ હવાઈ સફર કરી હતી. તેની સરખામણીએ ઓક્ટોબરમાં 403 વિમાનોની અવરજવર અને 1,03,615 મુસાફરો નોંધાયા હતા. આમ, એક મહિનામાં મુસાફરોની સંખ્યામાં 6,301નો વધારો થયો છે. વિમાનોની અવરજવરમાં પણ વધારો નોંધાતાં એરપોર્ટ પર હવાઈ ટ્રાફિક વધતો હોવાનું સ્પષ્ટ થાય છે.
વિન્ટર શિડ્યૂલમાં નવી સુવિધાઓથી મુસાફરોને રાહત
હીરાસર એરપોર્ટના વિન્ટર શિડ્યૂલમાં એરલાઇન્સ કંપનીઓએ હવાઈ સેવાઓનો વ્યાપ વધાર્યો છે. તેના કારણે રાજકોટ અને સૌરાષ્ટ્રના મુસાફરો માટે દિલ્હી, મુંબઈ, નવી મુંબઈ, બેંગલુરુ અને હૈદરાબાદ જેવા મહત્ત્વનાં શહેરો સુધી પહોંચવું વધુ સરળ બન્યું છે. આ ઉપરાંત સપ્તાહમાં ચાર દિવસ ગોવા અને પુણે માટેની ફ્લાઇટની સુવિધા ઉપલબ્ધ થતાં પ્રવાસીઓ અને વેપારીઓને પણ રાહત મળી છે.
હાલમાં એરપોર્ટ પરથી દૈનિક આશરે 11 ફ્લાઇટનું સંચાલન થઈ રહ્યું છે. તેમાં દિલ્હી માટે ચાર, મુંબઈ માટે ચાર, નવી મુંબઈ માટે બે અને બેંગલુરુ માટે એક ફ્લાઇટનો સમાવેશ થાય છે. આ ઉપરાંત પુણે અને ગોવા માટે સપ્તાહમાં ચાર દિવસ ફ્લાઇટની સુવિધા છે. દર મંગળવારે દિલ્હી માટે વધારાની એક ફ્લાઇટનું સંચાલન પણ કરવામાં આવે છે.
સુરત અને મુન્દ્રા માટે પણ હવાઈ સેવા
મુસાફરોની સુવિધા માટે રાજકોટથી સુરત વચ્ચે દૈનિક નવ સીટર નાના વિમાનની સેવા ઉપલબ્ધ છે. જ્યારે મુન્દ્રા જવા માટે સપ્તાહમાં ત્રણ દિવસ એર ટેક્સીની સુવિધા આપવામાં આવી રહી છે. આ સેવાઓના કારણે રાજકોટ સહિત સમગ્ર સૌરાષ્ટ્રના લોકોને રાજ્યનાં અન્ય શહેરો અને દેશનાં મહાનગરો સુધી પહોંચવામાં સરળતા થઈ રહી છે. કનેક્ટિંગ ફ્લાઇટ મારફતે વિદેશ પ્રવાસ કરનારા મુસાફરો માટે પણ હીરાસર એરપોર્ટ ઉપયોગી બની રહ્યું છે.
દિવાળી વેકેશનમાં ફ્લાઇટની માંગ વધવાની શક્યતા
શાળાઓમાં દિવાળી વેકેશન શરૂ થતાં હવાઈ મુસાફરોની સંખ્યામાં વધુ વધારો થવાની શક્યતા છે. ચાલુ સપ્તાહથી જ વિવિધ રૂટની ફ્લાઇટમાં બુકિંગ વધ્યું હોવાનું જાણવા મળે છે. તહેવારો અને વેકેશનના સમયગાળામાં મુસાફરોની માંગ વધતાં હવાઈ ભાડાંમાં પણ બે થી ત્રણ ગણો વધારો જોવા મળી શકે છે.
આગામી 20થી 25 દિવસ દરમિયાન અનેક ફ્લાઇટમાં મુસાફરોની સંખ્યા વધુ રહેવાની શક્યતા વ્યક્ત કરવામાં આવી રહી છે. હીરાસર એરપોર્ટ પર મુસાફરોની વધતી સંખ્યા અને નવી હવાઈ સેવાઓને પગલે રાજકોટ તથા સૌરાષ્ટ્રના હવાઈ જોડાણને વધુ વેગ મળી રહ્યો છે.
