BSFની 90મી બટાલિયનની સતર્કતાથી સરહદમાં ઘૂસણખોરીનો પ્રયાસ નિષ્ફળ; બોર્ડર પિલર નંબર 1109/M નજીકથી આશરે 40 વર્ષીય ચાંદ મહમંદ ઝડપાયો
કચ્છની આંતરરાષ્ટ્રીય સરહદ પર બોર્ડર સિક્યુરિટી ફોર્સ (BSF) દ્વારા વધુ એક પાકિસ્તાની નાગરિકને ઝડપી લેવામાં આવ્યો છે. હાજીપીર નજીક સરહદી વિસ્તારમાં ફરજ બજાવી રહેલા BSFના જવાનોએ શંકાસ્પદ હિલચાલ જણાતાં તાત્કાલિક કાર્યવાહી કરીને આ વ્યક્તિને પકડી પાડ્યો હતો. પ્રાથમિક માહિતી મુજબ, પકડાયેલો વ્યક્તિ આશરે 40 વર્ષનો ચાંદ મહમંદ હોવાનું જાણવા મળ્યું છે.
બોર્ડર પિલર નંબર 1109/M નજીક શંકાસ્પદ હિલચાલ
મળતી માહિતી અનુસાર, BSFની 90મી બટાલિયનના જવાનો હાજીપીર નજીક સરહદી વિસ્તારમાં પેટ્રોલિંગ અને સુરક્ષાની ફરજ પર હતા. તે દરમિયાન બોર્ડર પિલર નંબર 1109/M નજીક એક શખસ ભારતીય સરહદમાં પ્રવેશતો નજરે પડ્યો હતો. જવાનોએ તેને રોકવાનો પ્રયાસ કર્યો હતો, પરંતુ તે અટકવાને બદલે આગળ વધતો રહ્યો હતો.
આથી જવાનોએ સતર્કતા દાખવી તેનો પીછો કર્યો હતો અને ફેન્સિંગથી આશરે 20 મીટર આગળ તેને ઘેરીને ઝડપી લીધો હતો. BSFની ત્વરિત કાર્યવાહીને કારણે સરહદી વિસ્તારમાં શંકાસ્પદ રીતે પ્રવેશેલા આ વ્યક્તિને કાબૂમાં લેવામાં આવ્યો હતો.
ફાટેલો શર્ટ પહેરેલી હાલતમાં મળ્યો
પકડાયેલા શખસની પ્રાથમિક પૂછપરછ દરમિયાન તેનું નામ ચાંદ મહમંદ અને ઉંમર આશરે 40 વર્ષ હોવાનું જાણવા મળ્યું હતું. તેને ઝડપી લેવામાં આવ્યો ત્યારે તેના શરીર પર માત્ર ફાટેલો શર્ટ હતો. તે ગભરાયેલી હાલતમાં પાણી માગી રહ્યો હતો અને સતત કંઈક બોલી રહ્યો હતો.
તેની અસામાન્ય વર્તણૂકને ધ્યાનમાં રાખીને તે માનસિક રીતે અસ્વસ્થ હોઈ શકે તેવી આશંકા વ્યક્ત કરવામાં આવી રહી છે. જોકે, તેની માનસિક સ્થિતિ અંગે તબીબી તપાસ બાદ જ સ્પષ્ટતા થઈ શકશે.
તલાશી દરમિયાન વાંધાજનક વસ્તુ મળી નહીં
BSFના જવાનોએ પકડાયેલા શખસની સઘન તલાશી લીધી હતી. જોકે, પ્રાથમિક તપાસ દરમિયાન તેની પાસેથી કોઈ શંકાસ્પદ કે વાંધાજનક વસ્તુ મળી આવી નહોતી. હાલ તેની ઓળખ, સરહદ પાર કરીને ભારતમાં પ્રવેશવાના કારણો અને અન્ય વિગતો અંગે તપાસ હાથ ધરવામાં આવી છે.
કચ્છની સંવેદનશીલ સરહદ પર BSF દ્વારા સુરક્ષા વ્યવસ્થા વધુ સતર્ક રાખવામાં આવી રહી છે. આ ઘટનાને પગલે સરહદી વિસ્તારમાં સુરક્ષા એજન્સીઓ દ્વારા જરૂરી તપાસ અને પૂછપરછ કરવામાં આવી રહી છે.
