મુખ્યમંત્રી ભૂપેન્દ્ર પટેલની અધ્યક્ષતામાં અડાલજ ખાતે અભિવાદન સમારોહ યોજાયો; આંતરરાષ્ટ્રીય સહકારી મંચ પર ગુજરાતનું ગૌરવ વધારવા બદલ અગ્રણીઓએ પાઠવી શુભેચ્છાઓ
ગાંધીનગર: ઇફ્કો (IFFCO)ના ચેરમેન અને સહકારી ક્ષેત્રના અગ્રણી દિલીપભાઈ સંઘાણી આંતરરાષ્ટ્રીય સહકારી સંસ્થા ‘ઇન્ટરનેશનલ કોઓપરેટિવ એલાયન્સ’ (ICA)ના ડાયરેક્ટર તરીકે ચૂંટાયા છે. પનામા ખાતે યોજાયેલી ચૂંટણીમાં 108 દેશોનું પ્રતિનિધિત્વ કરતી આ સંસ્થામાં તેમને બહુમતીથી વિજય મળ્યો હતો. આ આંતરરાષ્ટ્રીય સિદ્ધિ બદલ ગાંધીનગરના અડાલજ ખાતે મુખ્યમંત્રી ભૂપેન્દ્ર પટેલની અધ્યક્ષતામાં તેમનો અભિવાદન અને સન્માન સમારોહ યોજાયો હતો.
મુખ્યમંત્રીએ સહકાર ક્ષેત્રે દિલીપભાઈના યોગદાનને બિરદાવ્યું
સમારોહને સંબોધતાં મુખ્યમંત્રી ભૂપેન્દ્ર પટેલે જણાવ્યું હતું કે વડાપ્રધાન નરેન્દ્ર મોદીના નેતૃત્વમાં વૈશ્વિક સ્તરે ભારતની પ્રતિષ્ઠામાં વધારો થયો છે. તેના પરિણામે ભારતીય નેતૃત્વને આંતરરાષ્ટ્રીય મંચ પર મહત્વપૂર્ણ સફળતાઓ મળી રહી છે. તેમણે વર્ષ 1978થી 2026 સુધીની દિલીપભાઈ સંઘાણીની સહકાર, સમાજસેવા અને જાહેર જીવનની લાંબી યાત્રાને બિરદાવી હતી.
મુખ્યમંત્રીએ દિલીપભાઈના 42 સભ્યોના સંયુક્ત પરિવારનો ઉલ્લેખ કરતાં જણાવ્યું હતું કે પરિવારની એકતાની ભાવના ભારતીય સંસ્કૃતિના ‘વસુધૈવ કુટુંબકમ’ના વિચારને સાકાર કરે છે.
ઇફ્કોની પ્રગતિને કાર્યકુશળતાનું પ્રતિબિંબ ગણાવી
મુખ્યમંત્રી ભૂપેન્દ્ર પટેલે વધુમાં જણાવ્યું હતું કે છેલ્લાં ચાર વર્ષ દરમિયાન ઇફ્કોએ નોંધાવેલી પ્રગતિ દિલીપભાઈ સંઘાણીની કાર્યકુશળતા અને વહીવટી ક્ષમતાનું પ્રતિબિંબ છે. ICA જેવી આંતરરાષ્ટ્રીય સંસ્થામાં ડાયરેક્ટર તરીકે તેમની પસંદગી માત્ર સહકારી ક્ષેત્ર માટે જ નહીં, પરંતુ સમગ્ર ગુજરાત માટે ગૌરવની બાબત છે.
રાજકીય, સહકારી અને સામાજિક ક્ષેત્રના અગ્રણીઓ ઉપસ્થિત
આ સન્માન સમારોહમાં રાજકોટના સાંસદ પરષોત્તમભાઈ રૂપાલા, જગદીશભાઈ વિશ્વકર્મા, પૂર્વ કેન્દ્રીય મંત્રી અને અન્નપૂર્ણા ધામના પ્રમુખ નરહરિભાઈ અમીન, પૂર્વ મંત્રી વલ્લભભાઈ કાકડિયા તથા પ્રશાંત કોરાટ સહિતના અગ્રણીઓ ઉપસ્થિત રહ્યા હતા.
આ ઉપરાંત ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (GCCI), અમદાવાદ બિલ્ડર એસોસિએશન (ABA), સમસ્ત પાટીદાર સમાજ અને ધ ડાયસ્ટફ્સ એસોસિએશન સહિતની વિવિધ સહકારી, ઔદ્યોગિક અને સામાજિક સંસ્થાઓના પ્રતિનિધિઓએ પણ કાર્યક્રમમાં હાજરી આપી હતી. ઉપસ્થિત મહાનુભાવોએ દિલીપભાઈ સંઘાણીને તેમની આંતરરાષ્ટ્રીય સિદ્ધિ બદલ અભિનંદન પાઠવી શુભેચ્છાઓ વ્યક્ત કરી હતી.
ICAમાં ડાયરેક્ટર તરીકે દિલીપભાઈ સંઘાણીની પસંદગીને ભારતીય સહકારી ક્ષેત્રની આંતરરાષ્ટ્રીય ઓળખ અને પ્રતિષ્ઠા સાથે જોડાયેલી મહત્વપૂર્ણ સિદ્ધિ તરીકે જોવામાં આવી રહી છે.
