આગ અને અકસ્માતની ઘટના સામે ત્વરિત કામગીરી માટે 65થી વધુ એમ્બ્યુલન્સ રાઉન્ડ ધ ક્લોક સ્ટેન્ડબાય; ફાયર વિભાગ, 108 સેવા અને પોલીસનું સંયુક્ત આયોજન
દિવાળીના તહેવારો દરમિયાન આગ, અકસ્માત અને કાયદો-વ્યવસ્થાની કટોકટી જેવી પરિસ્થિતિને પહોંચી વળવા અમદાવાદમાં તંત્ર દ્વારા વિશેષ ઇમરજન્સી એક્શન પ્લાન અમલી બનાવવામાં આવ્યો છે. અમદાવાદ ફાયર વિભાગ, 108 ઇમરજન્સી સેવા અને શહેર પોલીસ દ્વારા સંયુક્ત આયોજન કરવામાં આવ્યું છે. તહેવારો દરમિયાન ફટાકડાના કારણે આગની ઘટનાઓ અને બજારોમાં વધતી ભીડને ધ્યાનમાં રાખીને 1100થી વધુ ફાયર કર્મીઓને તૈનાત રાખવામાં આવ્યા છે, જ્યારે 65થી વધુ એમ્બ્યુલન્સને 24 કલાક સ્ટેન્ડબાય રાખવાની વ્યવસ્થા કરાઈ છે.
તમામ વિભાગોનું 24 કલાક મોનિટરિંગ
દિવાળીના દિવસોમાં ઇમરજન્સી કોલ્સમાં વધારો થવાની શક્યતાને ધ્યાનમાં રાખીને સંબંધિત વિભાગોના કર્મચારીઓની રજાઓ મોકૂફ રાખવામાં આવી છે. ફાયર વિભાગ, 108 સેવા અને પોલીસના અધિકારીઓ તથા કર્મચારીઓ સતત ફરજ પર રહેશે. કોઈપણ કટોકટીની સ્થિતિમાં તાત્કાલિક મદદ પહોંચાડી શકાય તે માટે 24 કલાક મોનિટરિંગની વ્યવસ્થા પણ ગોઠવવામાં આવી છે.
ગીચ વિસ્તારો અને ફટાકડા બજારોમાં ખાસ વ્યવસ્થા
શહેરના ગીચ રહેણાક વિસ્તારો, બજારો અને ફટાકડાના વેચાણ કેન્દ્રોમાં આગ કે અકસ્માતની ઘટના બને તો ઝડપથી પહોંચી શકાય તે માટે હંગામી ઇમરજન્સી પોઇન્ટ્સ ઊભા કરવામાં આવ્યા છે. આ વ્યવસ્થાથી ફાયર ફાઇટિંગ ટીમ અને એમ્બ્યુલન્સને ઘટનાસ્થળે પહોંચવામાં લાગતો સમય ઘટાડવાનો પ્રયાસ કરાશે.
આગ અને અકસ્માત સામે તંત્ર સજ્જ
દિવાળી દરમિયાન ફટાકડાના ઉપયોગ, બજારોમાં ભીડ અને વાહનવ્યવહારના વધતા દબાણને કારણે આગ તથા અકસ્માતની ઘટનાઓ બનવાની શક્યતા રહે છે. આવી પરિસ્થિતિમાં ફાયર વિભાગ આગ પર કાબૂ મેળવવા, 108 સેવા ઇજાગ્રસ્તોને તાત્કાલિક સારવાર માટે હોસ્પિટલ પહોંચાડવા અને પોલીસ ટ્રાફિક તથા કાયદો-વ્યવસ્થા જાળવવા કામગીરી કરશે.
તહેવારો દરમિયાન નાગરિકોની સુરક્ષા જળવાઈ રહે અને કોઈપણ ઇમરજન્સીમાં તાત્કાલિક મદદ મળી રહે તે હેતુથી અમદાવાદનું સમગ્ર તંત્ર સતર્ક રાખવામાં આવ્યું છે.
