24 કલાકમાં રાજ્યના 21 તાલુકામાં કમોસમી વરસાદ; તૈયાર મગફળી અને પશુઓના ઘાસચારાને નુકસાનની ભીતિ, ખેડૂતો સરકાર પાસે સહાયની માગ કરી રહ્યા છે
સૌરાષ્ટ્ર અને દક્ષિણ ગુજરાત સહિત રાજ્યના અનેક વિસ્તારોમાં શિયાળાની શરૂઆતમાં જ ચોમાસા જેવી સ્થિતિ સર્જાઈ છે. હવામાન વિભાગની કમોસમી વરસાદની આગાહી વચ્ચે 30 ઓક્ટોબર સવારે 6 વાગ્યાથી 31 ઓક્ટોબર સવારે 6 વાગ્યા સુધીના 24 કલાક દરમિયાન રાજ્યના 21 તાલુકામાં વરસાદ નોંધાયો હતો. અમરેલી અને વડિયા સહિતના વિસ્તારોમાં દોઢ ઇંચથી વધુ વરસાદ પડતાં ખેતીપાકોને નુકસાન થયું છે. ખાસ કરીને ખેતરોમાં તૈયાર પડેલી મગફળીના પાથરા પલળી જતાં ખેડૂતોની ચિંતા વધી છે.
અમરેલી જિલ્લામાં મગફળીના પાકને મોટો ફટકો
અમરેલી જિલ્લામાં શુક્રવારે, 30 ઓક્ટોબરની સાંજ બાદ વાતાવરણમાં અચાનક પલટો આવ્યો હતો. ખાંભા ગીર, બગસરા, અમરેલી, કુકાવાવ, બાબરા અને વડિયા પંથકમાં ગાજવીજ અને ભારે પવન સાથે કમોસમી વરસાદ ખાબક્યો હતો.
ખેડૂતોએ મહેનત કરીને તૈયાર કરેલી મગફળીને યાર્ડમાં લઈ જવાની તૈયારી કરી હતી, પરંતુ વરસાદને કારણે ખેતરોમાં પાથરેલી મગફળી પલળી ગઈ હતી. ખાસ કરીને ખાંભા ગીરનાં ગામડાં અને વડિયા પંથકના ખેડૂતોને ભારે નુકસાનની ભીતિ સતાવી રહી છે. મહિનાઓની મહેનત બાદ તૈયાર થયેલો પાક વરસાદમાં પલળતાં ખેડૂતોની મુશ્કેલી વધી છે.
મગફળી કાળી પડવાની અને ભાવ ઘટવાની ભીતિ
ખેડૂતોના જણાવ્યા અનુસાર અમરેલી અને વડિયામાં આશરે દોઢ ઇંચ વરસાદ પડતાં મગફળીના પાથરા પલળી ગયા છે. કેટલાક ખેડૂતોને સવારે ફરીથી પાથરા ભેગા કરવાની મજૂરી કરવી પડી હતી. મગફળી પલળવાથી તેની ગુણવત્તા બગડવાની અને કાળી પડી જવાની શક્યતા છે.
ખેડૂતોને આશંકા છે કે પાકની ગુણવત્તા ખરાબ થવાથી બજારમાં પ્રતિ મણ રૂ. 100થી 150 સુધી ઓછા ભાવ મળી શકે છે. ચાર મહિનાની મહેનત બાદ પાક તૈયાર થયો હતો, પરંતુ માવઠાને કારણે હવે ખર્ચ અને મહેનત બંને પર પાણી ફરી વળ્યું હોવાની લાગણી ખેડૂતો વ્યક્ત કરી રહ્યા છે.
દુષ્કાળ જેવી સ્થિતિ વચ્ચે માવઠાએ વધારી મુશ્કેલી
ખેડૂતોએ જણાવ્યું હતું કે જિલ્લામાં પાણીની અછત હોવા છતાં કૂવા અને બોરમાંથી માંડ-માંડ પાણી ખેંચીને મગફળીનો પાક બચાવ્યો હતો. સિંચાઈ માટે પૂરતું પાણી ઉપલબ્ધ ન હોવાથી પાક ઉગાડવો પણ મુશ્કેલ બન્યો હતો. આવી સ્થિતિમાં અચાનક ભારે પવન અને વરસાદે ખેતરોમાં તૈયાર પાકને નુકસાન પહોંચાડ્યું છે.
મગફળીના પાથરા ઉપરાંત પશુઓ માટે એકત્ર કરેલો ઘાસચારો પણ પલળી જતાં બગડવાની ભીતિ છે. ખેડૂતોના જણાવ્યા મુજબ, મગફળીની ગુણવત્તા બગડશે તો તેના વેચાણભાવમાં મોટો ઘટાડો થઈ શકે છે.
ખેડૂતોની સરકાર પાસે સહાયની માગ
કમોસમી વરસાદથી થયેલા નુકસાનને ધ્યાનમાં રાખીને ખેડૂતો દ્વારા પાક નુકસાનનો સર્વે કરવાની અને યોગ્ય સહાય આપવાની માગ કરવામાં આવી રહી છે. ખેડૂતોનું કહેવું છે કે એક તરફ પાણીની અછત અને બીજી તરફ માવઠાની આફતનો સામનો કરવો પડી રહ્યો છે. આવી સ્થિતિમાં સરકાર દ્વારા રાહત પેકેજ અથવા આર્થિક સહાય જાહેર કરવામાં આવે તેવી અપેક્ષા છે.
હવે વરસાદથી અસરગ્રસ્ત વિસ્તારોમાં પાકને કેટલું નુકસાન થયું છે તે અંગે સર્વે અને મૂલ્યાંકન થાય છે કે નહીં તેના પર ખેડૂતોની નજર છે. મગફળીની કાપણી અને વેચાણના સમયે પડેલા માવઠાએ સૌરાષ્ટ્રના ખેડૂતોની ચિંતામાં વધારો કર્યો છે.
