ઈચ્છાપોરના મોરા ગામની ગણેશ ફાર્મસીમાંથી રૂ. 4,500ની કિંમતની 560 ટ્રોસ્પાસ પ્લસ કેપ્સ્યુલ જપ્ત; દવાઓના સપ્લાય અને વેચાણ અંગે તપાસ શરૂ
સુરતમાં પીડાશામક દવાઓનો નશા માટે દુરુપયોગ થતો હોવાનો કિસ્સો સામે આવ્યો છે. ડૉક્ટરના પ્રિસ્ક્રિપ્શન વિના નશા માટે ઉપયોગમાં લેવાતી દવાઓનું વેચાણ થતું હોવાની બાતમીના આધારે ઈચ્છાપોર પોલીસ અને ફૂડ એન્ડ ડ્રગ્સ વિભાગે સંયુક્ત કાર્યવાહી કરી હતી. મોરા ગામના મોટા વાડા વિસ્તારમાં ભટલાઈ રોડ પર આવેલી ગણેશ ફાર્મસીમાં દરોડો પાડીને રૂ. 4,500ની કિંમતની 560 ટ્રોસ્પાસ પ્લસ કેપ્સ્યુલ જપ્ત કરવામાં આવી હતી.
બાતમીના આધારે ફાર્મસીમાં દરોડો
ઈચ્છાપોર પોલીસ સ્ટેશનની સર્વેલન્સ ટીમ પેટ્રોલિંગમાં હતી તે દરમિયાન બાતમી મળી હતી કે મોરા ગામની ગણેશ ફાર્મસીમાં ડૉક્ટરના પ્રિસ્ક્રિપ્શન વિના નશા માટે ઉપયોગમાં લેવાતી દવાઓનું વેચાણ કરવામાં આવી રહ્યું છે. બાતમીના આધારે પોલીસે ફૂડ એન્ડ ડ્રગ્સ વિભાગના ઇન્સ્પેક્ટરને સાથે રાખીને મેડિકલ સ્ટોરમાં તપાસ હાથ ધરી હતી.
તપાસ દરમિયાન ફાર્મસીમાંથી ટ્રોસ્પાસ પ્લસની કુલ 560 કેપ્સ્યુલ મળી આવી હતી. આ જથ્થાની કિંમત આશરે રૂ. 4,500 હોવાનું જણાવાયું છે. નિયમોના ઉલ્લંઘનના આક્ષેપ વચ્ચે ટીમે દવાઓનો જથ્થો જપ્ત કરીને આગળની કાર્યવાહી શરૂ કરી હતી.
ટ્રામાડોલ ધરાવતી દવાનો નશા માટે દુરુપયોગ થવાની આશંકા
ટ્રોસ્પાસ પ્લસ કેપ્સ્યુલમાં ટ્રામાડોલ હાઇડ્રોક્લોરાઇડ, ડાયસાયક્લોમાઇન હાઇડ્રોક્લોરાઇડ અને એસિટામિનોફેન જેવા ઘટકો હોય છે. તેમાં રહેલું ટ્રામાડોલ પીડાશામક દવા છે, જેનો ઉપયોગ તબીબી સલાહ અને દેખરેખ હેઠળ થવો જરૂરી છે. આ પ્રકારની દવાઓનો અયોગ્ય ઉપયોગ સ્વાસ્થ્ય માટે જોખમી બની શકે છે.
દવાઓ ક્યાંથી આવી અને કોને વેચાતી હતી તેની તપાસ
દરોડા દરમિયાન જપ્ત કરાયેલા દવાના જથ્થા અંગે ફૂડ એન્ડ ડ્રગ્સ વિભાગે આગળની કાર્યવાહી હાથ ધરી છે. પોલીસ હવે આ કેપ્સ્યુલ ક્યાંથી ખરીદવામાં આવી હતી, તેનો સપ્લાય કોણ કરતું હતું અને કોને વેચાણ કરવામાં આવતું હતું તે સહિતના મુદ્દાઓની તપાસ કરી રહી છે.
પ્રિસ્ક્રિપ્શન વિના દવાઓનું વેચાણ થયું હતું કે નહીં અને તેમાં અન્ય કોઈની સંડોવણી છે કે કેમ તે તપાસ પૂર્ણ થયા બાદ સ્પષ્ટ થશે. આ કાર્યવાહીથી મેડિકલ સ્ટોર્સમાં દવાઓના વેચાણ અને નિયમોના પાલન અંગે ફરી સવાલો ઊભા થયા છે.
