વહેલી સવારે 4:45 વાગ્યે બાળક પર હુમલો; વન વિભાગે દીપડાને પકડવા માટે પાંજરાં ગોઠવવાની કામગીરી હાથ ધરી
અમરેલી જિલ્લાના ધારી તાલુકાના નાગધ્રા ગામે વહેલી સવારે દીપડાના હુમલાની ઘટના સામે આવતાં સ્થાનિકોમાં ભયનો માહોલ ફેલાયો છે. ગામમાં 7 વર્ષના બાળક પર દીપડાએ હુમલો કરતાં બાળક ઇજાગ્રસ્ત થયું હતું. ઘટનાને પગલે બાળકને તાત્કાલિક સારવાર માટે હોસ્પિટલ ખસેડવામાં આવ્યું છે. બીજી તરફ, વન વિભાગની ટીમે હુમલાખોર દીપડાને પકડવા માટે કાર્યવાહી શરૂ કરી છે.
વહેલી સવારે માસૂમ બાળક પર હુમલો
પ્રાપ્ત વિગતો અનુસાર, ગીર પૂર્વ વન વિભાગ હેઠળ આવતા નાગધ્રા ગામમાં વહેલી સવારે આશરે 4:45 વાગ્યે દીપડાએ 7 વર્ષના બાળક પર હુમલો કર્યો હતો. અચાનક બનેલી આ ઘટનામાં બાળકને ઇજાઓ પહોંચતાં પરિવારજનો અને સ્થાનિક લોકોમાં દોડધામ મચી ગઈ હતી. બાળકને તાત્કાલિક હોસ્પિટલમાં સારવાર માટે લઈ જવામાં આવ્યું હતું.
દીપડાને પકડવા વન વિભાગની કવાયત
નાગધ્રા ગામ ગીરના જંગલ વિસ્તારની નજીક આવેલું હોવાથી આસપાસના સીમ અને વાડી વિસ્તારોમાં વન્યજીવોની અવરજવર રહેતી હોય છે. હુમલાની જાણ થતાં જ વન વિભાગની ટીમ ઘટનાસ્થળે પહોંચી હતી અને દીપડાની હિલચાલ પર નજર રાખવાની સાથે તેને પકડવા માટે અલગ-અલગ સ્થળોએ પાંજરાં ગોઠવવાની તજવીજ હાથ ધરી છે.
ગ્રામજનોને સાવચેત રહેવા અપીલ
ઘટના બાદ વન વિભાગ દ્વારા ગ્રામજનોને ખાસ સાવચેતી રાખવા અપીલ કરવામાં આવી છે. ખાસ કરીને રાત્રિના સમયે અને વહેલી સવારે એકલા ખેતરો કે વાડી વિસ્તારમાં જવાનું ટાળવા, બાળકોને એકલા બહાર ન મોકલવા અને દીપડો દેખાય તો તેની નજીક જવાને બદલે તાત્કાલિક વન વિભાગને જાણ કરવા સૂચના આપવામાં આવી છે.
બાળક પરના હુમલાની ઘટનાને પગલે ગ્રામજનોમાં ચિંતા ફેલાઈ છે. વન વિભાગ દ્વારા દીપડાને પકડવા માટે હાથ ધરાયેલી કામગીરી અને તેની હિલચાલ પર નજર રાખવામાં આવી રહી છે.
