જીરાફ સર્કલ પાસે ઝોન-6 LCBએ ફિલ્મી ઢબે પીછો કરીને બે આરોપીઓને ઝડપી લીધા; કાર અને દારૂ સહિત રૂ.17.31 લાખનો મુદ્દામાલ જપ્ત
અમદાવાદ: અમદાવાદના મણિનગર વિસ્તારમાં આવેલા જીરાફ સર્કલ પાસે ઝોન-6 લોકલ ક્રાઇમ બ્રાન્ચ (LCB)એ મોડી રાત્રે કાર્યવાહી કરીને કારમાંથી વિદેશી દારૂનો મોટો જથ્થો ઝડપી પાડ્યો છે. પોલીસે ફિલ્મી ઢબે પીછો કરીને ભાગવાનો પ્રયાસ કરી રહેલા બે આરોપીઓને ઝડપી લીધા હતા. કારમાંથી રૂ.3.74 લાખની કિંમતનો વિદેશી દારૂ મળી આવ્યો હતો. પોલીસે કાર અને દારૂ સહિત કુલ રૂ.17.31 લાખનો મુદ્દામાલ કબજે કરી સાત શખ્સો સામે ગુનો નોંધી વધુ તપાસ હાથ ધરી છે.
પોલીસને જોઈ કારચાલકે ગાડી ભગાવી
પોલીસ પાસેથી મળતી માહિતી મુજબ, ઝોન-6 LCBની ટીમને બાતમી મળી હતી કે એક કારમાં વિદેશી દારૂનો મોટો જથ્થો ભરીને કેટલાક શખ્સો મણિનગર તરફ આવી રહ્યા છે. આ બાતમીના આધારે પોલીસે જીરાફ સર્કલ પાસે વોચ ગોઠવી નાકાબંધી કરી હતી.
આ દરમિયાન બાતમી મુજબની શંકાસ્પદ કાર ત્યાંથી પસાર થતાં પોલીસે તેને રોકવાનો પ્રયાસ કર્યો હતો. જોકે, કારચાલકે પોલીસને જોઈ ગાડીની ઝડપ વધારી દીધી હતી અને ત્યાંથી ભાગવાનો પ્રયાસ કર્યો હતો. પોલીસે તાત્કાલિક ખાનગી વાહનોમાં કારનો પીછો શરૂ કર્યો હતો. થોડે દૂર જઈને પોલીસે કારને ઘેરીને અટકાવી દીધી હતી.
અંધારામાં ભાગવાનો પ્રયાસ, બે આરોપી ઝડપાયા
કાર અટકતાં જ તેમાં સવાર શખ્સોએ નીચે ઉતરીને અંધારાનો લાભ લઈ ભાગવાનો પ્રયાસ કર્યો હતો. જોકે, પોલીસે કોર્ડન કરીને બે આરોપીઓને ઝડપી લીધા હતા. ત્યારબાદ કારની તલાશી લેતાં અંદરથી રૂ.3.74 લાખની કિંમતનો વિદેશી દારૂ મળી આવ્યો હતો. પોલીસે દારૂનો જથ્થો અને કાર સહિત કુલ રૂ.17.31 લાખનો મુદ્દામાલ કબજે કર્યો હતો.
શામળાજીથી લાવવામાં આવતો હતો દારૂ
પ્રાથમિક તપાસમાં આ વિદેશી દારૂનો જથ્થો શામળાજીથી વિવેકસિંહ ઉર્ફે બાપુ પાસેથી લાવવામાં આવી રહ્યો હોવાનું સામે આવ્યું છે. આ મામલે પોલીસે સાહિલ, ધ્રુવ ઉર્ફે ધુલીયો સહિત કુલ સાત શખ્સો સામે ગુનો નોંધી તપાસ શરૂ કરી છે. દારૂનો જથ્થો કોના સુધી પહોંચાડવાનો હતો અને આ નેટવર્કમાં અન્ય કોણ સંડોવાયેલું છે તે દિશામાં પોલીસ તપાસ કરી રહી છે.
