રૂ.5.05 લાખના મુદ્દામાલ સાથે જામનગરનો 21 વર્ષીય કારચાલક ઝડપાયો; દારૂ સપ્લાય કરનાર બે શખ્સોની શોધખોળ
જામનગરઃ જામનગર જિલ્લાના લાલપુર તાલુકાના ઝાંખર ગામ પાસે મેઘપર (પડાણા) પોલીસે વોચ ગોઠવી સ્વિફ્ટ કારમાં થતી વિદેશી દારૂની હેરાફેરીનો પર્દાફાશ કર્યો છે. પોલીસ દ્વારા કારની તલાશી લેતાં તેમાંથી અલગ-અલગ બ્રાન્ડની નાની-મોટી કુલ 216 બોટલ દારૂ મળી આવી હતી. પોલીસે રૂ.1 લાખથી વધુ કિંમતના દારૂ અને કાર સહિત કુલ રૂ.5.05 લાખનો મુદ્દામાલ કબજે કરી એક શખ્સની ધરપકડ કરી છે.
મેઘપર (પડાણા) પોલીસ સ્ટેશનના સર્વેલન્સ સ્ટાફને બાતમી મળી હતી કે ઝાંખર ગામના પાટિયા તરફથી સ્વિફ્ટ કારમાં વિદેશી દારૂનો જથ્થો ભરી એક શખ્સ ઝાંખર ગામ તરફ આવી રહ્યો છે. બાતમીના આધારે પોલીસે ઝાંખર ગામ નજીક પુલની કામગીરી ચાલી રહી છે તે સ્થળે વોચ ગોઠવી હતી. દરમિયાન બાતમી મુજબની સ્વિફ્ટ કાર ત્યાંથી પસાર થતાં પોલીસે તેને કોર્ડન કરીને અટકાવી હતી.
કારની તલાશી દરમિયાન અંદરથી અલગ-અલગ બ્રાન્ડની કુલ 216 બોટલ વિદેશી દારૂ મળી આવતાં પોલીસે કારચાલક મહેન્દ્રસિંહ ગુમાનસિંહ વાઢેર (ઉંમર 21 વર્ષ, રહે. કૃષ્ણનગર શેરી નં.5, રોઝી પેટ્રોલ પંપ પાસે, જામનગર)ની ધરપકડ કરી હતી.
થાનગઢથી દારૂ લાવી સિંગચ ગામે સપ્લાય કરવાનો હતો
પોલીસની પ્રાથમિક તપાસમાં દારૂનો જથ્થો સુરેન્દ્રનગર જિલ્લાના થાનગઢના રહેવાસી કેતનભાઈ વિરજીભાઈ પરમાર પાસેથી મેળવવામાં આવ્યો હોવાનું ખુલ્યું હતું. આ જથ્થો લાલપુર તાલુકાના સિંગચ ગામના રહેવાસી ઇશ્વરસિંહ સદુભા વાઢેરને પહોંચાડવાનો હોવાનું પણ તપાસમાં સામે આવ્યું છે.
આ કેસમાં પોલીસે કેતનભાઈ પરમાર અને ઇશ્વરસિંહ વાઢેરને ફરાર દર્શાવી તેમની શોધખોળ શરૂ કરી છે. પોલીસે પ્રોહિબિશન એક્ટની કલમ 65(ઈ), 116(બી), 81 અને 98(2) હેઠળ ગુનો નોંધી વધુ તપાસ હાથ ધરી છે.
દારૂની હેરાફેરીના આ નેટવર્કમાં અન્ય કોઈની સંડોવણી છે કે કેમ અને જથ્થો ક્યાંથી લાવવામાં આવ્યો હતો તે સહિતના મુદ્દે પોલીસ તપાસ કરી રહી છે.
