ખામધ્રોળ રોડ પર SOGની કાર્યવાહી; કારમાંથી 29.634 કિલો ગાંજો, ત્રણ મોબાઈલ અને રોકડ સહિત રૂ.16.12 લાખનો મુદ્દામાલ કબજે
જૂનાગઢમાં લીલી પરિક્રમા પહેલાં જ સ્પેશિયલ ઓપરેશન ગ્રુપ (SOG) પોલીસે ગાંજાની હેરાફેરીનો પર્દાફાશ કર્યો છે. ખામધ્રોળ રોડ પર બાતમીના આધારે વોચ ગોઠવી પોલીસે અલ્ટો કારમાંથી 29.634 કિલોગ્રામ ગાંજાનો જથ્થો ઝડપી પાડ્યો હતો. આ મામલે ત્રણ શખ્સોની ધરપકડ કરવામાં આવી છે. પોલીસે ગાંજો, કાર, ત્રણ મોબાઈલ ફોન અને રોકડ સહિત કુલ રૂ.16,12,850નો મુદ્દામાલ કબજે કર્યો છે.
66 કેવી સબસ્ટેશન પાસે કાર રોકી તપાસ
SOGના ASI વિક્રમભાઈ ચાવડા અને તેમની ટીમને બાતમી મળી હતી કે ઇલિયાસ ઉર્ફે ટીપુ અલી મકરાણી, ઈમ્તિયાઝ ઉર્ફે ડહો અબ્દુલ સમા અને વારિસ ખાન મહેબુબ ખાન પઠાણ સફેદ રંગની અલ્ટો કારમાં ગાંજો લઈને પસાર થવાના છે.
આ બાતમીના આધારે પોલીસે જૂનાગઢના 66 કેવી સબસ્ટેશન તરફ જતા રસ્તા પર વોચ ગોઠવી હતી. દરમિયાન કાર નંબર GJ-6-ED-5957ને રોકીને તપાસ કરતાં પાછળની સીટ પરથી 29.634 કિલોગ્રામ ગાંજો મળી આવ્યો હતો. પોલીસે તેની કિંમત રૂ.14,81,700 આંકી છે.
ત્રણ આરોપીઓની ધરપકડ, NDPS હેઠળ ગુનો
પોલીસે ઇલિયાસ ઉર્ફે ટીપુ, ઈમ્તિયાઝ ઉર્ફે ડહો અને વારિસ ખાનની ધરપકડ કરી હતી. તેમની પાસેથી ગાંજાનો જથ્થો, અલ્ટો કાર, ત્રણ મોબાઈલ ફોન અને રૂ.950 રોકડા મળી કુલ રૂ.16,12,850નો મુદ્દામાલ જપ્ત કરવામાં આવ્યો હતો.
આ અંગે જૂનાગઢ તાલુકા પોલીસ સ્ટેશનમાં NDPS એક્ટ હેઠળ ગુનો નોંધી વધુ તપાસ હાથ ધરવામાં આવી છે.
ગાંજાનો જથ્થો બહારથી મંગાવ્યાનો ખુલાસો
પોલીસની પ્રાથમિક પૂછપરછમાં સામે આવેલી વિગતો મુજબ, મુખ્ય આરોપી અમીર અલી મકરાણીએ આશરે 15 દિવસ પહેલાં બહારથી ગાંજો મંગાવ્યો હતો. ત્યારબાદ વારિસ ખાનને રૂ.20 લાખમાં ગાંજાનાં 25 પાર્સલ સાચવવા આપ્યાં હોવાનું તપાસમાં જાણવા મળ્યું છે. અમીરના કહેવા મુજબ અલ્તાફ અને મુસ્તાક મિયા પણ આ જથ્થામાંથી થોડો-થોડો ગાંજો લઈ વેચતા હોવાનું પોલીસ તપાસમાં બહાર આવ્યું છે.
ત્રણ શખ્સો વોન્ટેડ જાહેર
આ પ્રકરણમાં પોલીસે મુખ્ય આરોપી અમીર અલી મકરાણી, નીચલા દાતાર વિસ્તારમાં રહેતા અલ્તાફ ભીખુદીન મકરાણી અને દાતાર રોડના મુસ્તાક મિયા બાઉદીન મિયા કાદરીને વોન્ટેડ જાહેર કર્યા છે. આ ત્રણેયને ઝડપી પાડવા પોલીસે તપાસ અને શોધખોળ તેજ કરી છે.
લીલી પરિક્રમા પહેલાં જૂનાગઢમાં ગાંજાનો આટલો મોટો જથ્થો ઝડપાતાં પોલીસ દ્વારા નશીલા પદાર્થોની હેરાફેરી સામેની કાર્યવાહી વધુ સઘન બનાવવામાં આવી છે.










