9.900 કિલો ગાંજાનો જથ્થો ઝડપાયો; ચોથી વખત ખેપ લાવ્યાની કબૂલાત, રિસીવરની શોધખોળ
રાજકોટ: શહેરની ભાગોળે આવેલી કુવાડવા ચોકડી નજીક એસઓજીની ટીમે 9.900 કિલોગ્રામ ગાંજા સાથે બિહારના 35 વર્ષીય શખ્સને ઝડપી પાડ્યો છે. ઝડપાયેલા ગાંજાની કિંમત રૂ.4.95 લાખ હોવાનું સામે આવ્યું છે. પોલીસે ગાંજા, રોકડ અને મોબાઈલ સહિત કુલ રૂ.5,00,520નો મુદ્દામાલ કબજે કર્યો છે.
ચોક્કસ બાતમીના આધારે કાર્યવાહી
રાજકોટ શહેરમાં નશીલા પદાર્થોના વેચાણ અને સપ્લાયને અટકાવવા પોલીસ દ્વારા કાર્યવાહી કરવામાં આવી રહી છે. આ દરમિયાન એસઓજીની ટીમને બાતમી મળી હતી કે પાસવાન નામનો શખ્સ અમદાવાદ હાઈવે પરથી કુવાડવા ચોકડી તરફ ગાંજાનો જથ્થો લઈને આવવાનો છે.
બાતમીના આધારે એસઓજીની ટીમે કુવાડવા ચોકડી નજીક વોચ ગોઠવી હતી. દરમિયાન ઉપેન્દ્ર પાસવાન ત્યાં પહોંચતા પોલીસે તેને કોર્ડન કરી અંગજડતી લીધી હતી.
9.900 કિલો ગાંજો મળી આવ્યો
અંગજડતી દરમિયાન ઉપેન્દ્ર પાસવાન પાસેથી રૂ.4.95 લાખની કિંમતનો 9.900 કિલોગ્રામ ગાંજો મળી આવ્યો હતો. પોલીસે ગાંજાનો જથ્થો કબજે કરી આરોપીની ધરપકડ કરી હતી.
આરોપીની ઓળખ ઉપેન્દ્ર બહાદુરરામ પાસવાન (ઉંમર 35 વર્ષ, મૂળ ભોજપુર, બિહાર) તરીકે થઈ છે.
ચોથી વખત રાજકોટ ગાંજાની ખેપ લઈને આવ્યો હતો
પોલીસની પ્રાથમિક પૂછપરછમાં આરોપીએ ચોથી વખત ગાંજાની ખેપ લઈને રાજકોટ આવ્યો હોવાની કબૂલાત કરી હોવાનું સામે આવ્યું છે. તે આ જથ્થો રાજકોટમાં મહંમદ નામના શખ્સને પહોંચાડવાનો હતો, પરંતુ ડિલિવરી કરે તે પહેલાં જ પોલીસના હાથે ઝડપાઈ ગયો હતો.
કુલ રૂ.5 લાખથી વધુનો મુદ્દામાલ કબજે
એસઓજીની ટીમે આરોપી પાસેથી ગાંજા ઉપરાંત મોબાઈલ ફોન અને રોકડ રકમ મળી કુલ રૂ.5,00,520નો મુદ્દામાલ કબજે કર્યો છે.
હવે પોલીસે ગાંજો લેવાનો હતો તે મહંમદ નામના રિસીવરની શોધખોળ શરૂ કરી છે. આ ઉપરાંત ગાંજાના સપ્લાય પાછળના સમગ્ર નેટવર્ક અંગે પણ તપાસ હાથ ધરવામાં આવી છે.
‘સે નો ટુ ડ્રગ્સ’ અંતર્ગત કાર્યવાહી
શહેરમાં યુવા પેઢીને નશાના રવાડે ચડતી અટકાવવા અને નાર્કોટિક્સ પદાર્થોના વેચાણ પર અંકુશ મેળવવા પોલીસ દ્વારા ‘સે નો ટુ ડ્રગ્સ’ મિશન હેઠળ પેડલરો અને નશાના વેપાર સાથે સંકળાયેલા શખ્સો સામે કડક કાર્યવાહી કરવામાં આવી રહી છે.
