અમદાવાદઃ રાજ્યમાં વરસાદની આગાહી વચ્ચે છેલ્લા 24 કલાક દરમિયાન ગુજરાતના 159 તાલુકામાં વરસાદ નોંધાયો છે. દક્ષિણ ગુજરાતમાં મેઘરાજાએ ફરી જોર પકડ્યું છે, જેમાં વલસાડ તાલુકામાં સૌથી વધુ વરસાદ નોંધાયો છે.
ગુજરાત રાજ્ય ઈમરજન્સી ઓપરેશન સેન્ટરના આંકડા મુજબ, 13 ઓગસ્ટ સવારે 6થી 14 ઓગસ્ટ સવારે 6 વાગ્યા સુધી વલસાડ તાલુકામાં સૌથી વધુ 87 મીમી (3.43 ઈંચ) વરસાદ નોંધાયો હતો. વલસાડ જિલ્લાના કપરાડામાં 43 મીમી, ધરમપુરમાં 35 મીમી અને પારડીમાં 32 મીમી વરસાદ પડ્યો છે.
ઉત્તર ગુજરાતમાં પણ વરસાદી માહોલ જોવા મળ્યો છે. પાલનપુરમાં 62 મીમી (2.44 ઈંચ) અને ડીસામાં 43 મીમી વરસાદ નોંધાયો છે. મધ્ય ગુજરાતમાં ધંધુકામાં 50 મીમી (1.97 ઈંચ) અને ધોલેરામાં 42 મીમી વરસાદ નોંધાયો હતો.
મહીસાગર જિલ્લાના સંતરામપુરમાં 46 મીમી અને વીરપુરમાં 44 મીમી વરસાદ પડ્યો છે. જ્યારે નવસારીના ખેરગામમાં 72 મીમી (2.83 ઈંચ) અને વલસાડના નાનાપોઢામાં 69 મીમી (2.72 ઈંચ) વરસાદ નોંધાયો છે.
સૌરાષ્ટ્રના ગીર સોમનાથ, જૂનાગઢ અને અમરેલી સહિતના વિસ્તારોમાં પણ વરસાદી ઝાપટાં પડ્યા છે. જોકે રાજ્યમાં હજુ સર્વત્ર વરસાદ જોવા મળ્યો નથી, પરંતુ રાજસ્થાન અને મધ્યપ્રદેશની સરહદી પટ્ટીમાં વરસાદનું જોર જોવા મળી રહ્યું છે.
વરસાદના કારણે ખેડૂતોમાં ખુશીનો માહોલ છે. બીજી તરફ, રાજ્યમાં અત્યાર સુધીમાં સિઝનનો કુલ વરસાદ 73 ટકાથી વધુ નોંધાઈ ચૂક્યો છે. આગામી દિવસોમાં વરસાદનું જોર વધે તેવી શક્યતા વચ્ચે તંત્ર પણ સ્થિતિ પર નજર રાખી રહ્યું છે.
